किन लड्दैछन् थाइल्यान्ड र कम्बोडिया ?

कम्बोडिया र थाइल्यान्डबीच झन्डै सय वर्षदेखि सीमा विवाद थाती रहेको छ । कम्बोडिया सन् १९५३ मा फ्रान्सबाट स्वतन्त्र भएको थियो । त्यतिबेलै दुई देशबीचको सीमारेखा कोरिएको थियो । सन् २००८ मा कम्बोडियाले ११औं शताब्दीको मन्दिरलाई युनेस्को विश्व सम्पदा सूचीमा दर्ताको प्रयास गरेपछि दुई देशबीचको विवाद उत्कर्षमा पुगेको हो । त्यसयता दुई देशबीच बेलाबेला झडप हुने गरेको छ ।

गत मे महिनामा कम्बोडियाका एक सैनिकको मृत्यु भएपछि दुई देशबीचको सम्बन्ध झन् चिसिएको हो । पछिल्ला दुई महिनामा दुवै देशले एक अर्कामाथि प्रतिबन्ध लगाउँदै आए । थाइल्यान्डका कार्यवाहक प्रधानमन्त्री फुमथम वेचयाचायले कम्बोडियासँगको विवादलाई ‘संवेदनशील’ बताउँदै यसलाई सावधानीपूर्वक र अन्तर्राष्ट्रिय कानुनअनुसार समाधान गर्नुपर्ने बताएका छन् ।

त्यस्तै कम्बोडियाका प्रधानमन्त्री हुन मानेतले आफ्नो देश विवादलाई शान्तिपूर्ण रूपमा समाधान गर्न चाहेको बताएका छन् । तर साथसाथै उनको चेतावनीसमेत छ, 'हामीसँग सशस्त्र आक्रमणविरुद्ध सशस्त्र प्रतिकार गर्नुबाहेक विकल्प छैन ।'

थाई समाचार पोर्टल द नेसनका अनुसार थाई सेनाले कम्बोडियाविरुद्ध 'युत्थ बोडिन' अपरेसन सुरु गरेको छ । जसको अर्थ 'भूमिको रक्षाका लागि गरिएको चरम युद्ध' भन्ने हुन्छ । 'युत्थ' को अर्थ 'युद्ध' हुन्छ भने 'बोडिन' को अर्थ पवित्र वा शाही भूमि हुने द नेसनले जनाएको छ ।