सियोल — दक्षिण कोरियाका केही भागमा बिहीबार मुसलधारे वर्षा भएको छ । मुलुकको मौसम एजेन्सीका अनुसार, त्यहाँ एक क्षेत्रमा सन् १९०४ मा पूर्ण रेकर्ड सुरु भएयता प्रतिघण्टा सबैभन्दा धेरै वर्षा भएको छ ।
दक्षिण कोरियामा सामान्यतया जुलाईमा मनसुनी वर्षा हुन्छ तर देशको दक्षिण चुङचेओङ प्रान्तका तीन क्षेत्रले यसै साता रेकर्ड गरिएको सबैभन्दा भारी वर्षा अनुभव गरेको आधिकारिक मौसम तथ्यांकले देखाएको छ ।
‘पश्चिमी सिओसन क्षेत्रमा ११४.९ मिलिमिटर (४.५ इन्च) प्रतिघण्टाको उच्च वर्षा भएको थियो, यो स्तर सामान्यतया एक सय वर्षमा एक पटक मात्र देखिन्छ,’ मौसम एजेन्सीका एक अधिकारीले भने, ‘यो सन् १९०४ पछि सबैभन्दा उच्च दर हो ।’
ती अधिकारीका अनुसार भारी वर्षा उत्तरी प्रशान्त उच्च चापको किनारमा बग्ने न्यानो र ओसिलो हावाका कारण भएको थियो, जसले बलियो वायुमण्डलीय अस्थिरता निम्त्याएको हो । दक्षिण कोरियाली प्रसारणकर्ताहरूले सेओसनमा पानीको दलदल बजार र अपार्टमेन्ट कम्प्लेक्सका साथै पार्क गरिएका कारहरू डुबानमा परेको विभिन्न भिडियोमा देखिएका छन् ।
दक्षिण चुङचेओङ प्रान्तमा रहेको होङसेओङ काउन्टीका बासिन्दालाई नजिकैको खोलामा आएको बाढीका कारण बिहीबार बिहान ‘तुरुन्तै सुरक्षित स्थानमा जान’ आदेश दिइएको थियो । काउन्टीका धेरै विद्यालय र नर्सरीहरू पनि बन्द गरिएका थिए । राजधानी सियोलबाट करिब ५० किलोमिटर (३१ माइल) दक्षिणमा रहेको ओसान सहरमा ओभरपासबाट १० मिटर अग्लो (३३ फिट) रिटेनिङ वाल सडकमा खसेपछि एक चालकको मृत्यु भएको छ ।
चुङचेओङ प्रान्तमा पहिरोपछि दुई जनालाई उद्धार गरिएको थियो । दक्षिण कोरिया गर्मीको मनसुन अवधिमा नियमित रूपमा बाढीको चपेटामा पर्दछ तर सामान्यतया राम्रोसँग तयारी हुन्छ र मृत्युको संख्या सामान्यतया अपेक्षाकृत कम हुन्छ ।
वैज्ञानिकका अनुसार जलवायु परिवर्तनले विश्वभरका मौसमी घटनालाई चरम र बारम्बार बनाएको छ । दक्षिण कोरियाले पनि २०२२ मा कीर्तिमानी वर्षा र बाढीको सामना गरेको थियो । बाढीमा कम्तीमा ११ जनाको मृत्यु भएको थियो ।
तिनीहरूमा तीन व्यक्ति सियोलको बेसमेन्ट अपार्टमेन्टमा फसेर मरेका थिए । उक्त अपार्टमेन्ट ओस्कार विजेता कोरियाली फिल्म ‘प्यारासाइट’ का कारण अन्तर्राष्ट्रिय रूपमा चर्चित भएको थियो । चरम मौसमका लागि जलवायु परिवर्तनलाई दोष दिँदै सरकारले सियोलको वर्षा रेकर्ड सुरु भएपछिको सबैभन्दा भारी वर्षा भएको बताएको थियो ।
