अस्ट्रिया — मंगलबार अस्ट्रियाको ग्राज सहरको एक स्कूलमा बन्दुकधारीले गोली चलाउँदा नौ जनाको मृत्यु भएको छ । स्कूल भित्र जथाभावी गोली चलाउने सोही स्कुलका पूर्व विद्यार्थी रहेको प्रहरीले जानकारी दिएको छ । २१ वर्षीय ती विद्यार्थी पनि विद्यालयको एक शौचालयमा मृत फेला परेका छन् ।

उनले जथाभावी गोली चलाएर आफैं आत्महत्या गरेको प्रहरीको भनाइ छ ।

नौ पीडितहरूमा छ महिला र तीन पुरुष रहेका छन् । उनीहरूको पहिचा र उमेर हालसम्म प्रहरीले सार्वजनिक गरेका छैन । प्रहरीले प्रारम्भिक अनुसन्धान समाप्त नभएसम्म पीडितहरूको बारेमा थप जानकारी जारी नदिने बताएको छ ।

विशेष रूपमा प्रशिक्षित ‘कोब्रा युनिट’ सहित एक प्रहरी हेलिकप्टरका सुरक्षा अधिकारीहरू घटनास्थलमा पुगेका थिए । प्रहरीले स्थानीय समय अनुसार बिहान १० बजेतिर हाई स्कूलको भवनमा गोली चलेको खबर पाएपछि प्रतिक्रिया गरेको बताएको छ । घटनापछि विद्यार्थी र उनीहरूका अभिभावकहरूका लागि सुरक्षित भेला स्थलको रूपमा लगभग डेढ एक किलोमिटर टाढा रहेको रंगशाला खोलिएको थियो ।