वासिङटन — यमनस्थित विद्रोही समूह हुथीविरुद्धको सैन्य कारबाहीको रणनीतिक योजनाबारे परिवारका सदस्यसँग गरेको च्याट बाहिरिएपछि अमेरिकी रक्षामन्त्री पिट हेगसेथ विवादमा तानिएका छन् । 

हेगसेथले यमनमा गर्न लागिएको अमेरिकी हवाई आक्रमणबारेका विवरण समाजिक सञ्जाल सिग्नलको समूहमा सार्वजनिक गरेका थिए । सिबिएस न्युजका अनुसार उक्त समूहमा उनकी पत्नी, भाइ र व्यक्तिगत वकिल सदस्य थिए । 

१५ मार्चमा पठाइएका सन्देशमा हुथीलक्षित आक्रमण गर्ने जिम्मेवारी दिइएको ‘एफ/ए-१८’ होर्नेट्सको उडान तालिका समावेश थियो । उक्त समूहमा हेगसेथकी पत्नी जेनिफर रहेकी छन् । फक्स न्यूजकी पूर्व निर्माता जेनिफर हाल रक्षा विभागको कुनै आधिकारिक भूमिकामा छैनन् । 

यसअघि वाल स्ट्रिट जर्नलले जेनिफर आधिकारिक विदेश यात्राहरूमा रक्षामन्त्रीसँग सामेल भएको र अन्तर्राष्ट्रिय नेताहरूसँग उच्च-स्तरीय बैठकमा भाग लिएको समाचार सार्वजनिक गरेको थियो । त्यसपछि उनको कडा आलोचना भएको थियो ।