सोल — डढेलोका कारण दक्षिण कोरियाको दक्षिणपूर्वी क्षेत्रमा चार जनाको मृत्यु भएको छ भने ६ जना घाइते भएका छन् । न्युयोर्क टाइम्सले गृह मन्त्रालयलाई उदृत गर्दै २९ क्षेत्रका झन्डै २ हजार हेक्टरमा डढेलो सल्किएको जनाएको छ । बीबीसीले डढेलाे नियन्त्रणमा खटिएका दुई अग्नि नियन्त्रकको पनि मृत्यु भएकाे उल्लेख गरेको छ ।

डढेलो नियन्त्रण गर्न दर्जनौं हेलिकोप्टर परिचालन गरिएको छ भने कम्तीमा एक हजार स्थानीयलाई स्थानान्तरण गरिएको छ । राजधानी सिओलबाट करिब १६० माइल दक्षिणपूर्वमा पर्ने सान्चेओङ काउन्टीमा डढेलो फैलिएको हो । शनिबार साँझ सरकारले उक्त क्षेत्रमा विपद् घोषणा गरेको थियो ।

स्थानीय अधिकारीहरूका अनुसार आइतबार बिहानसम्म सान्चेओङमा लागेको डढेलो करिब ३० प्रतिशत नियन्त्रणमा ल्याइएको छ । दक्षिण कोरियाली अधिकारीका अनुसार सुक्खा र हावाहुरीयुक्त मौसमका कारण आगो छिट्टै फैलिएको छ ।