पेरिस — दुई वर्षभन्दा लामो समयदेखि इरानी जेलमा रहेका फ्रान्सेली रिहा भएका छन् । रिहा भएका ३४ वर्षीय ओलिभर ग्रोन्डो अक्टोबर २०२२ देखि इरानी जेलका थिए । 

दक्षिणी इरानमा पक्राउ परेका ग्रोन्डोलाई ‘इस्लामिक गणतन्त्रविरुद्ध षड्यन्त्र’ गरेको आरोपमा पाँच वर्षको जेल सजाय सुनाइएको थियो । तर उनको परिवारले उक्त आरोप अस्वीकार गर्दै आएको छ ।

फ्रान्सेली राष्ट्रपति इमानुएल म्याक्रोंले गोन्डोको रिहाइ भएको पुस्टि गर्दै उनी स्वतन्त्र भएको बताएका छन् । ‘३४ वर्षीय ग्रोन्डोले आफ्ना प्रियजनसँग भेटघाट गरिसक्नुभएको छ,’ म्याक्रोंले सामाजिक सञ्जाल एक्समा लेखेका छन् । इरानमा रहेका अन्य नागरिकको रिहाइका लागि पनि पहल भइरहेको म्याक्रोंको भनाइ छ । ‘इरानले हिरासतमा लिएका अन्य दुई फ्रान्सेली नागरिकको रिहाइ सुनिश्चित गर्न हाम्रो निरन्तर प्रयास रहनेछ,’ उनले भनेका छन् । 

फ्रान्सेली विदेशमन्त्री ज्याँ नोएल बारोटले ‘एक्स’ मा एक विज्ञप्ति जारी गर्दै ग्रोन्डोको विमानभित्रको तस्बिर पोस्ट गरेका छन् । ‘इरानमा ८ सय ८७ दिनसम्म बन्धक बनाइएका ग्रोन्डोको आफ्नो परिवार, प्रियजन र आफ्नो देशसँग पुनर्मिलन भएको छ । यो ठूलो राहत हो,’ उनले लेखेका छन् । 

जनवरीमा पक्राउ परेपछि पहिलो पटक सार्वजनिक रूपमा बोल्दै, ग्रोन्डोले इरानी अधिकारीहरूले उनलाई ‘बन्धक’ बनाएको बताए । उनको परिवारले उनलाई फारसी कविताको प्रशंसक भएको र विश्व भ्रमणका क्रममा पर्यटक भिसामा इरान पुगेको जनाएको छ । 

अन्य दुई फ्रान्सेली नागरिक हाल इरानमा हिरासतमा छन् । शिक्षिका सेसिल कोहलर र उनका साथी ज्याक पेरिसलाई मे २०२२ मा पक्राउ गरिएको थियो । उनीहरूमाथि मजदुर आन्दोलन चर्काउन खोजेको आरोप लगाइएको छ ।  तर उनीहरूका परिवारले त्यसको खण्डन गरेका छन् ।