काठमाडौँ — क्यानडाका प्रधानमन्त्री जस्टिन ट्रुडो आफ्नै लिबरल पार्टीबाट राजीनामाको दबाब सामना गरिरहेका छन् । पार्टीभित्रको असन्तुष्टिले उनका पछिल्ला नीतिहरू र कार्यसम्पादनमाथि गम्भीर प्रश्न उठेको छ ।
उनकै पार्टीका एक शीर्ष मन्त्रीले अप्रत्याशित रूपमा राजीनामा दिएर बजेटको व्यवस्थापनप्रति कडा आलोचना गरेपछि ट्रुडोलाई राजीनामाको दबाब बढेको हो ।
पछिल्ला वर्षहरूमा ट्रुडो बढ्दो मुद्रास्फीति र आर्थिक नीतिहरूमा निर्णय लिन नसकेको भन्दै आलोचित बनेका छन् । प्रधानमन्त्रीको रूपमा झन्डै एक दशक लामो कार्यकालपछि उनले समर्थन गुमाउँदै गएका छन् ।
छोटो समयमै ट्रुडोलाई जबरजस्ती हटाउन कुनै प्रक्रिया वा प्रावधान छैन । उनी स्वेच्छाले मात्र राजीनामा दिन सक्छन् । अथवा संसद्मा अविश्वासको प्रस्ताव पास गरी उनको पार्टीलाई सत्ताबाट हटाउन सकिन्छ । उनको पार्टीलाई सत्ताबाट हटाइएको अवस्थामा आउँदो चुनावमा विपक्षी कन्जरभेटिभ पार्टीलाई फाइदा पुग्ने सम्भावना प्रबल देखिन्छ ।
यदि ट्रुडोको पार्टीले संसद्मा विश्वासको मत जित्न सफल भयो भने ट्रुडो अर्को आम निर्वाचनसम्म प्रधानमन्त्री रहन सक्छन् । वर्तमान चुनौतीपश्चात पार्टीले बहुमत कायम राख्न सकेमा ट्रुडोको सरकार बच्नेछ ।
मंगलबार लिबरल पार्टीका सांसदहरूले ट्रुडोलाई राजीनामा दिन आह्वान गरिरहेका बेला प्राकृतिक स्रोत मन्त्री जोनाथन विल्किन्सनले भने केही समय दिनुपर्ने बताएका छन् ।
