इसिबाले शुक्रबार नेतृत्वको दौडमा रहेका लोकप्रिय प्रतिद्वन्द्वी सिन्जिरो कोइजुमीलाई पनि चुनावी रणनीतिकारको नेतृत्व गर्न आग्रह गरेका छन् । तर उनले शुक्रबारको चुनावमा पराजित कट्टरपन्थी महिला रूढिवादी सानई ताकाइचीलाई कुनै जिम्मेवारी दिएका छैनन् । 

शुक्रबार पार्टी नेतृत्वमा विजयी भएपछि इसिबाले जापानको अर्थतन्त्रलाई पुनरुत्थान गर्ने, सुरक्षा खतराहरूलाई सम्बोधन गर्ने र एलडीपीलाई सफा गर्ने बताएका थिए । पछिल्लो समय एलडीपी विभिन्न सार्वजनिक घोटाला र आन्तरिक द्वन्द्वको विवादमा तानिएको छ । 

त्यस्ता घोटालाहरूमध्ये जापानको विवादास्पद युनिफिकेशन चर्चले एलडीपीलाई पारेको प्रभाव र पार्टीका गुटहरूलाई गरिएको सहयोग मुख्य छन् । विभिन्न घोटालाहरूको बावजुद एलडीपी जापानमा अधिकांश समय शासन गर्ने सबैभन्दा लोकप्रिय राजनीतिक दल हो 

पछिल्लो विवादले ठूलो जनआक्रोश निम्तिएपछि तत्कालीन प्रधानमन्त्री किसिदाको राजनीतिक करिअर नै धरापमा परेको हो । जसका कारण गत अगष्टमा उनले एलडीपीको नेतृत्वका लागि पुनः प्रतिस्पर्धा नगर्ने घोषणा गरेका थिए । ‘एलडीपी प्रमुखका लागि हुने आगामी चुनावमा जनतालाई नेतृत्व परिवर्तन हुनेछ भनेर देखाउन आवश्यक छ,’ त्यतिबेला उनले भनेका थिए ।