दिल्लीमा शिष्टाचार भेट कुर्दै नेपाली राजदूत- विश्व - कान्तिपुर समाचार
कान्तिपुर वेबसाईट
AdvertisementAdvertisement

दिल्लीमा शिष्टाचार भेट कुर्दै नेपाली राजदूत

भारतका लागि नेपाली राजदूत शंकर शर्माले दिल्लीमा जिम्मेवारी सम्हालेको तीन महिना भइसक्दा पनि विदेश मन्त्रालयमा शिष्टाचार भेटको अवसर पाएका छैनन्
राजेश मिश्र

नयाँदिल्ली — नेपालका लागि नवनियुक्त राजदूत नवीन श्रीवास्तवले काठमाडौं पुगेको एक साता पनि पूरा नहुँदै राष्ट्रपति, प्रधानमन्त्री र परराष्ट्रमन्त्रीलाई भेट्न भ्याइसक्दा दिल्लीमा भने नेपाली राजदूतले महिनौंसम्म विदेश मन्त्रालयमा शिष्टाचार भेटको अवसर पाएका छैनन् ।

भारतका लागि नेपाली राजदूत शंकर शर्माले दिल्लीमा जिम्मेवारी सम्हालेको तीन महिना पूरा भइसकेको छ । चैत ६ मा राष्ट्रपतिबाट शपथ लिएका शर्मा त्यसको एक सातापछि नयाँदिल्ली आइपुगेका थिए । चैत १८ देखि प्रधानमन्त्री शेरबहादुर देउवाको भारत भ्रमण रहेको भए पनि उनले नयाँदिल्ली आएको झन्डै डेढ महिनापछि वैशाख २८ मा भारतीय राष्ट्रपति रामनाथ कोविन्दसमक्ष ओहदाको प्रमाणपत्र बुझाएका थिए ।

ओहदाको प्रमाणपत्र बुझाएपछि मात्रै राजदूतले सम्बन्धित देशमा औपचारिक रूपमा कूटनीतिक काम गर्न पाउने अभ्यास छ । शर्माले ओहदाको प्रमाणपत्र बुझाउन डेढ महिना कुर्नुपर्दा, भारतीय राजदूतले भने काठमाडौं पुगेको छैटौं दिनमा राष्ट्रपति विद्यादेवी भण्डारीसमक्ष आफ्नो ओहदाको प्रमाणपत्र बुझाए ।

राष्ट्रपतिकोबाट प्रधानमन्त्री शेरबहादुर देउवालाई भेट्न उनी बालुवाटार पुगेका थिए । सरोकारवाला परराष्ट्रमन्त्री वा पदाधिकारलाई भेट्नुअगावै उनले प्रधानमन्त्रीलाई सहजै भेटे । प्रधानमन्त्रीलाई भेटेको भोलिपल्ट परराष्ट्रमन्त्री नारायण खड्कालाई भेटे । असार ११ मा काठमाडौं ओर्लिएका श्रीवास्तवले असार १६ मा ओहदाको प्रमाणपत्र बुझाएका थिए ।

यता, दिल्लीमा भने राजदूत शर्माले ओहदाको प्रमाणपत्र बुझाएलगत्तै दूतावासले प्रधानमन्त्री नरेन्द्र मोदी, विदेशमन्त्री एस जयशंकर, विदेश सचिव विनय मोहन क्वात्रालगायत उच्च पदस्थ नेतृत्वसँग शिष्टाचार भेटका लागि समय मिलाइदिन विदेश मन्त्रालयलाई पत्राचार गरेको थियो । तर, पत्र पठाएको एक महिना पूरा भइसक्दा पनि कुनै ‘रेस्पोन्स’ प्राप्त नभएको दूतावासले जनाएको छ ।

नयाँ राजदूतले ओहदाको प्रमाणपत्र बुझाइसकेपछि भेटघाटका लागि समय मागर गरी पत्र पठाइएको तर जवाफ नआइसकेको जनाए । ‘मुख्य रूपमा प्रधानमन्त्री, विदेशमन्त्री र विदेश सचिवको समय उपलब्धताको प्रतीक्षामा छौं,’ ती अधिकारीले भने ‘तर, उहाँहरूको व्यस्तताले होला समय प्राप्त भइसकेको छैन ।’

राजदूतको विदेशमन्त्री र सचिवसँगको भेटलाई महत्त्वपूर्ण मानिन्छ । द्विपक्षीय सम्बन्ध र विषयहरूका कुरा कार्यान्वयनका लागि ती भेटहरू नै लाभदायक हुने गर्छ । केही समयअघि भारतीय जनता पार्टी (भाजपा) को कार्यालयमा पार्टी अध्यक्षले दिल्लीस्थित विदेशी नियोगका प्रमुखलाई डाकेका बेला विदेशमन्त्री जयशंकर पनि उपस्थित थिए । राजदूत शर्माले केही बेर उनीसँग भलाकुसारीको मौका पाएका थिए । तर, औपचारिक भेटको भने अझै टुंगो लागेको छैन ।

यस अवधिमा भने शर्माले केही मन्त्री र सेनाध्यक्षसँग भेटघाट गरिसकेका छन् । शर्माले सरकारी तहको हरेक औपचारिक भेटघाटका लागि विदेश मन्त्रालयको सहमति कुर्नुपर्छ । विदेशमन्त्री र सचिवकै समय उपलब्ध हुन केही समय लागे पनि राजदूत शर्माले नेपाललाई तत्काल आवश्यक रहेको मल आपूर्तिका लागि दुई पटक भारतका रसायन तथा मलमन्त्री मनसुख माण्डविया र मन्त्रालयका अधिकारीहरूसँग भेट गरेका छन् ।

यसअघि तत्कालीन नेपाली राजदूत नीलाम्बर आचार्यले विदेशमन्त्रीमा नियुक्त भएका जयशंकरसँग महिनौंको प्रतीक्षापछि मात्रै भेट्न पाएका थिए । तर, पहिलो भेटमा आचार्यले ईपीजी प्रतिवेदन बुझ्न भइरहेको ढिलाइ र सीमा विवाद वार्ताबाट हल गर्न कुरा उठाएपछि जयशंकरले त्यसलाई रुचाएका थिएनन् ।

राजदूत शर्माको ‘एग्रिमो’ पठाउन नै भारतले ढिलो गरेको थियो । तीन महिनापछि मात्रै शर्माको आगमनलाई भारतले स्वीकृति दिएको थियो । तर, भारतले श्रीवास्तवलाई नियुक्ति गरेको सूचना पाउनासाथ नेपालले उनको एग्रिमो पठाएको थियो । भारत सरकारले जेठ ३ मा श्रीवास्तवलाई नेपालका लागि राजदूत नियुक्ति गरेको हो ।

शर्मालाई भने सरकारले २०७८ कात्तिक ११ मै भारतका लागि राजदूतमा सिफारिस गरेको थियो । संसदीय सुनुवाइ समितिले मसिंर २४ मा उनको नाम अनुमोदन गरेको थियो । त्यसपछि भारतलाई एग्रिमोका लागि आग्रह गरिएको थियो । भारतले तीन महिनापछि (चैत २) मा मात्रै शर्माको एग्रिमो पठाएको थियो ।

प्रकाशित : असार १९, २०७९ ०७:५५
प्रतिक्रिया
पठाउनुहोस्

‘स्वास्थ्य समस्याको जोखिममा युरोपेली कामदार’

कल्याणकारी सेवा कम्पनी ‘लाइफवर्क्स’ को नयाँ अध्ययनले ४१ प्रतिशत कामदार चिन्ता, तनाव, हुटहुटी, एक्लोपनाजस्ता मानसिक स्वास्थ्यको उच्च जोखिममा रहेका देखाएको हो
उच्च मानसिक तनाव हुने देशको सूचीमा पोल्यान्ड, स्पेन, फ्रान्स, इटाली, जर्मनी र नेदरल्यान्ड्स अगाडि
ददि सापकोटा

पेरिस — युरोपेली मुलुकका झन्डै आधा कामदार मानसिक स्वास्थ्य समस्याको उच्च जोखिममा रहेको तथ्यांक एक अध्ययनले सार्वजनिक गरेको छ । कल्याणकारी सेवा कम्पनी ‘लाइफवर्क्स’ को नयाँ अध्ययनमा कोभिड–१९ को महामारी र रुस–युक्रेन युद्धपछिको आर्थिक संकटले युरोपेली कामदारहरूको मनोबल अभूतपूर्व रूपमा कमजोर भइरहेको देखिएको हो ।

फ्रान्स, जर्मनी, इटाली, स्पेन, नेदरल्यान्ड्स र पोल्यान्डमा अप्रिलमा गरिएको अनलाइन सर्वेक्षणमा ५ सयभन्दा बढी व्यक्तिले भाग लिएका थिए । सहभागीमध्ये करिब आधाले आफूहरूले महामारीअघिभन्दा बढी तनाव झेलिरहेको र अझ बढी संवेदनशील महसुस गरिरहेको बताएका छन् । अध्ययनमा सहभागी एकतिहाइले उनीहरूको मानसिक स्वास्थ्यले कामको नतिजा, सक्रियता र उत्पादकतालाई नकारात्मक असर गरिरहेको बताएका छन् ।

लाइफवर्क्सद्वारा गरिएको सर्वेक्षणमा सहभागी ४१ प्रतिशतलाई उच्च चिन्ता, तनाव, हुटहुटी, एक्लोपनाजस्ता मानसिक स्वास्थ्यको उच्च जोखिम देखिएको हो । महामारीअघि सन् २०१७ देखि २०१९ मा गरिएको सर्वेक्षणको तुलनामा हाल तीन गुणा बढी समस्या देखा परेको रिपोर्टमा उल्लेख छ ।

युरोपेलीहरूले पछिल्लो समय कोरोना महामारीका कारण त्रासमा परेको, कठिन आर्थिक प्रभाव बेहोर्नुपरेको, एकान्त र एक्लै बस्नुपरेको, आफन्तसँग टाढिनुपरेको र मानसिक नियन्त्रण गुमाउने अवस्थाका कारण यस्तो समस्या देखिएको लाइफवर्क्सको विश्वव्यापी अनुसन्धानका नेतृत्वकर्ता पाउला आलानले बताएकी छन् ।

‘त्यो सबै दुःख पार गरेर जब हामीले सुरुङको अन्त्यमा प्रकाशको धिपधिपे उज्यालो देख्न लागेका थियौं । त्यही बेला युक्रेनमा युद्ध देखापर्‍यो । त्यसले फेरि निराशामा धकेल्यो । यो सबैको परिणाम त्यही हो,’ उनले भनिन् ।

युवा, महिला, अभिभावक र कम आम्दानी भएका मानिसहरू सबैभन्दा बढी संघर्ष गरिरहेको प्रतिवेदनमा उल्लेख छ । ‘आय र मानसिक स्वास्थ्यबीचको सम्बन्ध धेरै बलियो छ,’ प्रतिवेदनमा उल्लेख छ, ‘अब युरोपेली कामदारहरू पनि उच्च मुद्रास्फीति र समस्या अन्त्य गर्न नसक्ने डरबारे चिन्तित छन् ।’

कोरोना कहरसँगै प्रविधिमा भरपर्ने बानी विकसित भएको र मानिसहरू साँघुरो संसारमा जिउने गरेका उनको भनाइ छ । ‘यी दुई वर्षमा हामीले हाम्रो संसार साँघुरो बनाएका छौं र त्यही साँघुरो संसारमा काम गर्ने बानी पारेका छौं । धेरै मानिसहरूले वास्तवमा यो ठीक छ भन्ने महसुस गरिरहेका छन् । यो हाम्रो मानसिक स्वास्थ्यका लागि राम्रो कुरा होइन,’ आलानले भनेकी छन्, ‘हामी हाम्रो काममा धेरै कुशल भएका छौं । हामी यी २०–मिनेट जुम कलहरूमा लेनदेन, बातचित गरेर अगाडि बढ्न सक्छौं । तर त्यसले आत्मीयताको भावना निर्माण गर्दैन । मानिसहरूलाई मानसिक तनाव दिन्छ ।’

गणनामा संलग्न भएकामध्ये एकतिहाइभन्दा बढीले ढुक्क भएर बस्नका लागि आफूहरूसँग आपत्कालीन बजेटसम्म नभएकोमा चिन्ता व्यक्त गरेका छन् । त्यस्तै, उनीहरूले अन्य कारकमा चिन्ता, अनिश्चितता, एक्लोपना, असहयोग, तनावको स्तरलाई औंल्याएका छन् । सर्वेक्षणअनुसार सबैभन्दा कमजोर मानसिक स्वास्थ्य स्कोर पोल्यान्ड (५३.६) को छ । त्यस्तै, स्पेन (५७.१), फ्रान्स (५७.४), इटाली (५८.४), जर्मनी (६२.३) र नेदरल्यान्ड (६७.९) उच्च मानसिक तनाव हुने देशको सूचीमा अग्र स्थानमा छन् । सर्वेक्षणमा सहभागीमध्ये एकतिहाइले अक्सर एक्लो महसुस गर्ने गरेका जनाएका प्रतिवेदनमा उल्लेख छ ।

प्रकाशित : असार १९, २०७९ ०७:५५
पूरा पढ्नुहोस्
प्रतिक्रिया
पठाउनुहोस्
×