तालिबानले भन्यो : ३ दिनमा नयाँ सरकार बन्छ, महिलालाई सहभागी गराइन्छ- विश्व - कान्तिपुर समाचार
कान्तिपुर वेबसाईट
AdvertisementAdvertisement

तालिबानले भन्यो : ३ दिनमा नयाँ सरकार बन्छ, महिलालाई सहभागी गराइन्छ

कान्तिपुर संवाददाता

काठमाडौँ — तालिबानले अफगानिस्तानमा तीन दिनभित्र नयाँ सरकार घोषणा गर्ने भएको छ । कतारमा रहेको तालिबानको राजनीतिक कार्यालयका उपप्रमुख तथा वार्ता टोलीका सदस्य शेर मोहम्मद अब्बास स्टानिकजईले तीन दिनभित्र अफगानिस्तानमा नयाँ सरकार बन्ने बताएका हुन् ।

तालिबानका प्रवक्ता जबीहुल्लाह मुजाहिद मंगलबार काबुल विमानस्थलमा सैनिकहरूसँग कुरा गर्दै । तस्बिर : रोयटर्स

बीबीसीको पश्तो रेडियोसँगको कुराकानीमा उनले नयाँ सरकारमा २० वर्षदेखि सरकारमा रहेका व्यक्तिलाई सहभागी नगराइने बताए । उनले भने, ‘अफगानिस्तानमा इस्लामिक इमिरेट्सले यस्तो सरकार बनाउनेछ कि जसलाई अफगानिस्तानभित्र र बाहिरबाट पनि समर्थन प्राप्त हुनेछ ।’

स्टानिकजईले अफगानिस्तानमा सबैलाई प्रतिनिधित्व गराएर एक समावेशी सरकार बनाइने पनि बताएका छन् । नयाँ सरकारमा ‘पवित्र र शिक्षित’ व्यक्ति रहने पनि उनको भनाइ छ । यसअघि तालिबानका प्रवक्ता जबीहुल्लाह मुजाहिदले वक्तव्य जारी गर्दै नयाँ सरकार गठनका लागि शीर्ष नेता मुल्ला हबीबुल्लाह अंखुदजादाको अध्यक्षतामा कन्दाहारमा तीन दिन बैठक सम्पन्न भएको जानकारी दिएका थिए ।

सरकारमा महिलालाई पनि सहभागी गराइने

नयाँ सरकारमा महिलालाई पनि सहभागी गराइने स्टानिकजईको भनाइ छ । उनले भने, ‘नयाँ सरकारमा ठूलो संख्यामा महिलालाई पनि सहभागी गराइनेछ । तर अहिले नै यो स्पष्ट छैन कि उनीहरु वरिष्ठ पदमा रहनेछन् वा छैनन् ।’

तस्बिर : रोयटर्स

तालिबानको सरकारमा महिलालाई काम गर्न कुनै अप्ठेरो नहुने पनि उनको दाबी छ । कार्यालयमा गएर महिला कर्मचारीले निर्वाध रुपमा काम गर्न पाउने उनको भनाइ छ ।

‘अन्तर्राष्ट्रिय समुदायले मान्यता दिन्छ’

स्टानिकजईले अन्तर्राष्ट्रिय समुदायले पनि आफूहरुको सरकारलाई मान्यता दिने बताए । उनले भने, ‘हामीलाई विश्वास छ कि अन्तर्राष्ट्रिय समुदायले हाम्रो सरकारलाई मान्यता दिनेछ । किनभने २० वर्षपछि अफगानिस्तानमा शान्ति स्थापना भएको छ र अफगानिस्तानमा नयाँ सरकार बनिरहेको छ । अब अफगानिस्तानमा कुनै युद्ध छैन ।’ अफगानी नागरिक एकजुट भएकाले पनि विश्वले यसको फाइदा उठाउन सक्ने उनको भनाइ छ । अमेरिका, युरोपेली युनियनलगायतका विश्वका सबै देशसँग तालिबानले असल सम्बन्ध स्थापना गर्न चाहेको पनि उनले बताए । कतारमा रहेको राजनीतिक कार्यालयका सदस्यले विभिन्न देशका प्रतिनिधिसँग कुराकानी गरिरहेको पनि उनले जानकारी दिएका छन् ।

त्यस्तै अमेरिकी सेनाले अफगानिस्तान छाडेपछि बन्द रहेको काबुल विमानस्थल दुई दिनमा सञ्चालनमा आउने उनले बताए । काबुलस्थित हमिद कारजाई अन्तर्राष्ट्रिय विमानस्थल निर्माणका लागि २५–३० मिलियन अमेरिकी डलर खर्च लाग्ने र उक्त खर्च कतार र टर्कीले उपलब्ध गराउने बताए ।

गत अगस्ट १५ मा तालिबान काबुलमा प्रवेश गरेसँगै राष्ट्रपति असरफ गनीले मुलुक छाडेका थिए ।

-बीबीसी हिन्दीको सहयोगमा

प्रकाशित : भाद्र १६, २०७८ १७:२८
प्रतिक्रिया
पठाउनुहोस्

सेयर बजारमा सामान्य सुधार

कान्तिपुर संवाददाता

काठमाडौँ — धितोपत्र बजारमा सेयर कारोबार नेप्से परिसूचकमा सामान्य सुधार देखिएको छ । नेपाल स्टक एक्सचेन्जका अनुसार नेप्से परिसूचक साताको चौथो दिन बुधबार २९७६.९८ बाट बढेर २९७७.२९ विन्दुमा सेयर कारोबार बन्द भएको हो । 

साताको चौथो दिन नेप्से ०.०४ प्रतिशतले बढेको हो । ठूला कम्पनी सेयर कारोबार मापक सेन्सेटिभ परिसूचक ०.१७ अंकले बढेर ५५०.६९ विन्दुमा पुगेको छ । कारोबार भएको १३ उपसमूहमध्ये बुधबार चार उपसमूहको सेयर उकालो लागेको छ भने बाँकी नौ उपसमूहको सेयर भने ओरालो लागेको छ ।

बुधबार होटल तथा पर्यटनको सेयर बढेको छ । त्यस्तै बैंकिङ ०.४, होटल तथा पर्यटन ३.७६, लाइफ इन्स्योरेन्स ०.४४, इन्भेस्टमेन्ट ०.०१ को सेयर कारोबार बढेको छ । त्यस्तै ट्रेडिङ ०.२, विकास बैंक ०.७, हाइड्रो पावर ०.५८, फाइनान्स २.७५, ननलाइफ इन्स्योरेन्स ०.४६, उत्पादन ०.०४, माइक्रो फाइनान्स ०.११ तथा म्युचुअल फण्ड ०.३८ विन्दुले घटेको छ ।

आज २२६ वटा कम्पनीको कारोबार भएको छ । १ करोड ७१ लाख ८२ हजार ८ सय ७१ कित्ता सेयरको ९ अर्ब ३५ करोड १७ लाख ९९ हजार ६ सय ५५ रुपैयाँ बराबर कारोबार भएको छ ।बुधबार अरुण भ्याली हाइड्रो पावर डेभलपमेन्ट कम्पनी लिमिटेडको सर्वाधिक कारोबार भएको छ । उक्त कम्पनीको ५९ करोड ९९ सय लाख ३६ हजार रुपैयाँ बराबरको कारोबार भएको हो । यस्तै रुरु जलविद्युत परियोजना कम्पनी लिमिटेडका लगानीकर्ताले सबैभन्दा धेरै कमाएका छन् ।

कम्पनीको सेयर मूल्य ७.५५ प्रतिशतले बढेर १ हजार ४ सय ४८ रुपैयाँ पुगेको छ । ओरियन्टल्स होटल लिमिटेड ६.१४, युनाइटेड मोदी हाइड्रो पावर लिमिटेड ६.०४, हिमालयन ऊर्जा विकास कम्पनी लिमिटेड ६.०२ , सोल्टी होटल लिमिटेड ५.७३ ,मनकामना स्मार्ट लघुवित्त वित्तीय संस्था लिमिटेड ४.००, कालिका पावर कम्पनी लिमिटेड ३.९९, नयाँ सारथी लघुवित्त वित्तीय सस्था लिमिटेड ३.४५, हिमालयन पावर पार्टनर लिमिटेड ३.४३, शीर्ष स्थानमा रहेका छन ।

आज भएको कारोबारमा सनराइज फस्ट म्युचुअल फण्ड ९.९८, खानीखोला हाइड्रो पावर कम्पनी लिमिटेड ७.७७, गुहेश्वरी मर्चेन्ट बैंक एण्ड फाइनान्स कम्पनी लिमिटेड ६.२७ कर्पोरेट विकास बैँक लिमिटेड ५.७५, आईसीएफसी फाइनान्स लिमिटेडले ५.२८ प्रतिशतले गुमाएका छन् ।

-यसअघि समाचारमा नेप्से परिसूचक दोहोरो अंकले बढ्यो हुन गएकोमा भूलसुधारसहित सच्याइएको छ । -सम्पादक

प्रकाशित : भाद्र १६, २०७८ १७:२३
पूरा पढ्नुहोस्
प्रतिक्रिया
पठाउनुहोस्
×