इजरायलमा कामका लागि जान खुल्यो बाटो- विश्व - कान्तिपुर समाचार

इजरायलमा कामका लागि जान खुल्यो बाटो

विशिष्ट श्रम बजारमा नेपाली कामदारको अस्थायी रोजगारीसम्बन्धी सम्झौता कार्यान्वयन गर्न बिहीबार दुई देशबीच हस्ताक्षर भएको हो ।
होम कार्की

काठमाडौँ — इजरायलको केयरगिभर क्षेत्र (स्याहारसुसार केन्द्र) मा जान रोकिएको नेपाली श्रमिकका लागि झन्डै ११ वर्षपछि बाटो खुलेको छ । आकर्षक सेवासुविधा र मर्यादित कार्यस्थल मानिएको इजरायलमा श्रमिकमाथि अत्यधिक आर्थिक भार परेको भन्दै सन् २००९ देखि नेपाली जान रोकिएको थियो ।

इजरायलको विशिष्ट श्रम बजारमा नेपाली कामदारको अस्थायी रोजगारीसम्बन्धी सम्झौता कार्यान्वयन गर्न बिहीबार दुई देशबीच हस्ताक्षर भएपछि नेपालीका लागि बाटो खुलेको हो । प्रोटोकलमा वैदेशिक रोजगार विभागका महानिर्देशक कुमार दाहाल र इजरायलका तर्फबाट नेपालका लागि इजरायली राजदूत खनान गोडेरले हस्ताक्षर गरेका छन् ।

‘श्रम सम्झौतालाई कार्यान्वयन गर्न प्रोटोकलमा भएको हस्ताक्षरले श्रमिक पठाउने बाटो खोलेको छ,’ श्रम, रोजगार तथा सामाजिक सुरक्षा मन्त्रालयका प्रवक्ता भरतमणि पाण्डेले कान्तिपुरसँग भने, ‘मन्त्रालयले आन्तरिक कार्यविधि बनाउनासाथ श्रमिक पठाउने प्रक्रिया सुरु भइहाल्छ ।’

उनका अनुसार पहिलो चरणमा ५ सय जना श्रमिकलाई पठाइनेछ । जसमा ६० प्रतिशत महिला र ४० प्रतिशत पुरुष छन् । ‘तत्काल ५ सय जना जाने हो । त्यसपछि पनि थपिँदै जान सक्छ,’ उनले भने, ‘छनोट विधि र लागतको विषय कार्यविधिले तय गर्नेछ ।’ अब जाने श्रमिकले घरमा नभई अस्पताल, नर्सिङ होम, दिवा स्याहार केन्द्रलगायतमा काम गर्नेछन् । यसअघि घरमै बस्ने गरी कियरगिभरको काममा नेपालीलाई लगिएको हुन्थ्यो । श्रमिकले मासिक खाना र आवाससहित १५ सय डलर पाउने छन् । राजदूत गोडेरले नेपाली श्रमिकले इजरायली नागरिकसरह नै सेवासुविधा तथा पारिश्रमिक पाउने बताए ।

इजरायलले श्रमिक पठाउने स्रोत देशबाट नर्सिङ क्षेत्रमा २५ सय श्रमिक ल्याउने नीति छ । त्यसमा नेपालबाट ५ सय जना लैजान लागिएको परराष्ट्र मन्त्रालयले जनाएको छ । ‘इजरायलमा नेपालीले सम्मानपूर्वक काम गर्न पाउने छन् । निकै मिहिनेतपछि नेपालीका लागि इजरायल खुल्यो । अब इजरायलको मागअनुसार नेपाली जान पाउनेछन्,’ इजरायलका लागि नेपाली राजदूत अञ्जान शाक्यले भनिन् ।इजरायलको श्रमिक भर्ना प्रक्रियामा निजी क्षेत्रलाई सामेल गरिएको छैन ।

वैदेशिक रोजगार विभागका महानिर्देशक कुमार दाहालले दुवै देशको सरकारी संयन्त्रमार्फत नै श्रमिक पठाउने सहमति भएको बताए । ‘श्रमिक छनोट प्रक्रिया सरकारी संयन्त्रबाटै हुन्छ । यसका लागि इजरायली पक्षले विभागलाई पूरै जिम्मेवारी प्रदान गरेको छ,’ दाहालले भने, ‘श्रमिक भर्ना प्रक्रियाका लागि विभागमा तोकिएको कर्मचारीले नै काम गर्नेछ ।’

इजरायलले पठाएको मागपत्रका आधारमा विभागले नै रोस्टर तयार गरेर अनुमतिका लागि मात्रै इजरायल पठाउनेछ । ‘छनोटको मापदण्डबमोजिम सूचना प्रकाशन गर्छौं । सर्ट लिस्टमा परेकालाई अन्तर्वार्ता लिई रोस्टर तयार गर्छौं । त्यसरी छनोट भएका रोस्टरलाई इजरायलमा पठाउनेछौं । उनीहरूले अनुमति पठाएपछि हामी श्रमस्वीकृति दिनेछौं,’ उनले भने । एसएलसी उत्तीर्ण गरी १५ महिने स्वास्थ्य सेवासम्बन्धी अध्ययन गरेका वा प्लस टु उत्तीर्ण गरी तीन महिने कियरगिभरसम्बन्धी तालिम लिएका अंग्रेजी बोल्न सक्नेले इजरायल जान योग्य हुने मानिएको छ ।

इजरायल जाने सबै खर्च भने श्रमिक आफैंले बेहोर्नुपर्छ । मेडिकल परीक्षण, कल्याणकारी शुल्क, बिमा, टिकटलगायतको खर्च श्रमिककै हुनेछ । कति रकम लाग्छ भनेर तय भने भइसकेको छैन । एकपटक गइसकेपछि ५ वर्षसम्म काम गर्न पाइनेछ ।

प्रकाशित : माघ ९, २०७७ ०९:११
प्रतिक्रिया
पठाउनुहोस्

चुनौतीसामु ह्वाटमोर

‘मैले गरेका प्रत्येक काम चुनौतीसाथ नै आएको थियो । नेपालको प्रशिक्षक बन्नु पनि कम चुनौती थिएन, यो सजिलो खाले होइन ।’
विनोद पाण्डे

काठमाडौँ — डेव ह्वाटमोर भलै विश्वकप विजेता प्रशिक्षक हुन् । उनले श्रीलंकासहित पाकिस्तान, बंगलादेश, जिम्बावे जस्ता राष्ट्रलाई प्रशिक्षण दिएको किन नहोस् । नेपालको राष्ट्रिय क्रिकेट टोलीका प्रशिक्षक बनेपछि उनीसामु चुनौतीका चाङ छन् । आफू चुनौतीमाझ उभिएको उनले नै स्विकारेका छन् ।

‘मैले गरेका प्रत्येक काम चुनौतीसाथ नै आएको थियो । नेपालको प्रशिक्षक बन्नु पनि कम चुनौती थिएन, यो सजिलो खाले होइन,’ नेपाल क्रिकेट संघ (क्यान) ले बिहीबार राष्ट्रिय टोलीको प्रशिक्षकमा प्रस्तुत गरेपछि ह्वाटमोरले भने । श्रीलंकालाई सन् १९९६ को विश्वकप दिलाएका उनलाई क्यानले जनवरी १ देखि प्रशिक्षकका रूपमा लिने निर्णय गरेको थियो ।

त्यसैक्रममा उनी आइतबार नेपाल आइपुगेका थिए । रोयल सिंघी होटलमा चार दिन ‘सेल्फ आइसोलेसन’ मा बसेपछि बुधबार राति उनको कोभिड–१९ को पीसीआर रिपोर्ट नेगेटिभ आएको थियो । अर्को दिन उनी नेपालको प्रशिक्षक भएर प्रस्तुत भए । बिहीबार बिहानको पत्रकार सम्मेलनपछि उनी लगत्तै त्रिवि क्रिकेट मैदान कीर्तिपुर पुगेर भीआईपी बक्सबाट प्रधानमन्त्री कप क्रिकेट हेरेका थिए । पवन सर्राफले राष्ट्रिय प्रतियोगितामा अहिलेसम्मकै छिटो अर्धशतक बनाउँदा प्रहार भएका लामा सटहरू ह्वाटमोरतिर सोझिएका थिए ।

नेपालले जिम्बावेमा सम्पन्न सन् २०१८ को विश्वकप छनोटबाट एकदिवसीय अन्तर्राष्ट्रिय मान्यता पाएको थियो । यो २०२३ सम्मका लागि हो । यसबीचमा नेपालले विश्व क्रिकेट लिग २ का खेल खेल्नेछ । ‘हामीले यो निश्चित गर्नुपर्छ कि नेपालले एकदिवसीय अन्तर्राष्ट्रिय मान्यता कायम राख्नुपर्छ र आफ्नो स्तर निर्धारण गर्नुपर्छ । म यी चुनौतीहरू स्वीकार्न पाउँदा खुसी छु । तत्कालको काम भनेको खेलाडीलाई जित्न तयार बनाउनु नै हो,’ ह्वाटमोरले भने ।

ओमानमा अमेरिकासम्मिलित लिग २ को त्रिकोणात्मक शृंखला नेपालले अब खेल्ने प्रतियोगिता हो । यहींबाट ह्वाटमोरको नेपाली टोली प्रशिक्षकको यात्रा सुरु हुनेछ । २०२३ को फेब्रुअरीसम्म गरी नेपालले लिग २ का ३२ एकदिवसीय अन्तर्राष्ट्रिय खेल खेल्नेछ । सन् २०१४ मा ट्वान्टी–२० विश्वकप खेलिसकेको नेपालको लक्ष्य अहिलेलाई एकदिवसीय विश्वकप नै रहेको छ ।

‘बोर्डले मलाई सधैं समर्थन गर्नेछ, तर विश्वकप पुग्न धेरै गाह्रो छ । धेरै देशले हामीले जस्तै ठ्याक्कै प्रयास गरिरहेका छन् । जबसम्म सपना देख्दैनौं वा आकांक्षा बनाउँदैनौं, तबसम्म त्यो सपना प्राप्त गर्न सक्दैनौं,’ ह्वाटमोरले भने, ‘हामी सबै खेल जित्न गइरहेका छौं भनेर म वाचा गर्न त सक्दिनँ तर लक्ष्य बनाएअनुरुप मिहिनेत गर्ने हो भने केही उपलब्धि हासिल गर्न सकिन्छ ।’

बल एन्ड ब्याट फाउन्डेसनले ह्वाटमोरलाई सन् २०१७ मा कोचिङ क्लिनिकका लागि नेपाल ल्याएको थियो । दुई साताको क्लिनिकमा उनले नेपाली राष्ट्रिय टोलीका खेलाडीलाई पनि प्रशिक्षण दिएका थिए । ह्वाटमोरले त्यही कारण आफूले नेपालमा प्रशिक्षक बन्न आवेदन दिएको जनाउँदै भने, ‘नेपाल क्रिकेट संघले मलाई जुन विश्वास देखाएको छ, त्यसअनुरुप म मेरो आफ्नो विज्ञता नेपालको क्रिकेट प्रगतिलाई प्रयोग गर्नेछु ।’

ह्वाटमोर पछिल्लो पटक गत वर्षको मार्चमा नेपाली क्रिकेट नजिक पुगेका थिए, जतिखेर उनी सिंगापुरका प्रशिक्षक थिए । ट्वान्टी–२० को एसिया क्षेत्रमा छनोट चरणमा नेपालले बैंककमा सिंगापुरसँग खेल्दै थियो । तर वर्षाका कारण नेपाल र सिंगापुरको त्यो खेल रद्द हुन पुगेको थियो । त्यसै प्रतियोगितामा हङकङ र मलेसियासँग हार बेहोरेपछि नेपाल ट्वान्टी–२० विश्वकप एसिया छनोटमै पुग्न असफल भयो । त्यसयता नेपालले अन्तर्राष्ट्रिय क्रिकेट खेलेको छैन ।

प्रकाशित : माघ ९, २०७७ ०९:००
पूरा पढ्नुहोस्
प्रतिक्रिया
पठाउनुहोस्
×