कोरोना भाइरस प्रकोप : इटालीमा ‘लकडाउन’ अवधि थपियो

एजेन्सी

रोम — नोवल कोरोना भाइरस (कोभिड–१९) संक्रमण रोक्न संघर्षरत इटालीले ‘लकडाउन’ अवधि थप गरेको छ । इटालीले ‘इस्टर’ अर्थात् अप्रिल १२ सम्म ‘लकडाउन’ अवधि थप गरेको हो । 

पछिल्लो तीन सातादेखि इटाली ‘पूर्ण रूपमा बन्द’ छ । अत्यावश्यकबाहेक कसैलाई पनि बाहिर निस्कन दिइएको छैन भने मानिस भेला हुने सबै सार्वजनिक क्षेत्र बन्द छन् । देशैभर सुरक्षाकर्मीको बाक्लो उपस्थिति गराइएको छ र ठूलो संख्यामा स्वास्थ्यकर्मी परिचालित छन् ।


मृतक संख्याका आधारमा कोरोनाबाट विश्वमै सबैभन्दा प्रभावित इटालीमा थप संक्रमित संख्यामा भने सोमबार कमी आएको छ । आइतबार ३ हजार ८ सय १५ जना संक्रमित पुष्टि भएकोमा सोमबार मात्र १ हजार ६ सय ४८ थप संक्रमित पाइएका छन् । नयाँ संक्रमित संख्यामा कमी आए पनि मृतक संख्यामा भने पुनः वृद्धि भएको छ । अघिल्लो दिन ७ सय ५६ जनाको मृत्यु भएको इटालीमा सोमबार थप ८ सय १२ जनाको मृत्यु भएको छ ।


मंगलबारसम्म इटालीमा ११ हजार ५ सय ९१ जनाको कोभिड–१९ संक्रमणका कारण मृत्यु भइसकेको छ भने १ लाख १ हजार ७ सय ३९ जना संक्रमित पुष्टि भएकोमा १४ हजार ६ सय २० जना निको भएका छन् । संक्रमण र मृत्यु दर रोक्न हरसम्भव प्रयासमा रहेको इटालीले अबको एक साताभित्र कोराना संकट उच्च बिन्दूमा पुग्ने र त्यसपछि घट्दै जाने विश्वास व्यक्त गरेको छ ।

प्रकाशित : चैत्र १८, २०७६ ११:१०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

घर फिर्तीको माग गर्दै सीमामै धर्ना

माधव ढुंगाना

भैरहवा — नेपाल प्रवेशको अनुमति नपाएर सुनौली नाकामा तीन दिनदेखि अलपत्र परेका सयौं नेपाली सोमबार रातिदेखि धर्नामा बसेका छन् । घर फिर्तीको माग गर्दै उनीहरुले दशगजा क्षेत्रमा धर्ना सुरु गरेका हुन् । उनीहरुले नेपाल सरकारले तोकेको स्थानमा क्वारेन्टाइनमा बस्न तयार रहेको समेत जनाएका छन् । 

इलाका प्रहरी कार्यालय बेलहियाका अन्सुार धर्ना बस्नेमा महिला र बालबच्चा सहित करिब ४ सय जना छन् । सोमबार राति उनीहरु एकैसाथ नाकाबाट नेपाल प्रवेश गर्न खोजेका थिए । नेपालतर्फ तैनाथ सुरक्षाकर्मीले उनीहरुलाई रोकेपछि केहीबेर धकेलाधकेल भएको थियो ।


भारतको गाजियाबादबाट घर फर्केका अर्घाखाँचीको मालारानी गाउँपालिका—३ का सुनिल खनालले आफूहरु नेपाल प्रवेश गर्न लाग्दा नेपाली सुरक्षाकर्मीले सामान्य लाठीचार्ज समेत गरेको बताए । ‘लाठीचार्ज हुन थालेपछि भाग्ने क्रममा एक/दुई लडे पनि गम्भीर घाइते भने कोही भएको छैन,’ खनालले भने, ‘त्यसपछि फर्किने क्रममा भारतीय सुरक्षाकर्मीले पनि हामीलाई रोकेपछि सीमामै धर्नामा बसेका हौं ।’ सीमामा अलपत्रहरुको नाम ठेगानासहितको विवरण माग गरिएकाले सबैले लेखेर बुझाउने क्रममा रहेको उनले जनाए ।

जिल्ला प्रशासन कार्यालय रुपन्देहीका प्रशासकीय अधिकृत तथा सूचना अधिकारी जनक थापाले ,नाकामा अलपत्र परेका नेपालीलाई के गर्ने भन्ने बारेमा अहिलेसम्म स्पष्ट कुनै निर्णय नआएको जनाए । ‘आन्तरिक तयारीमा जुटेका छौं,’ उनले भने ।

नाकामा अलपत्र परेकाहरुलाई खानबस्न र खानेपानीको समस्या देखिएको छ । सीमावर्ती बेलहियाका युवा, भैरहवाका विभिन्न संस्था र भारत सुनौलीका स्थानीय मिलेर खानेबस्ने प्रबन्ध मिलाउँदै आएका छन् ।

प्रदेश नम्बर ५ सरकारको सोमबार बसेको मन्त्रिपरिषद्को बैठकले सीमा क्षेत्रमा अलपत्रमा परेकालाई सम्बन्धित जिल्लामा समूह बनाई पठाउने निर्णय गरेको थियो । ती नागरिकलाई सम्बन्धित क्वारेन्टाइनमा राखी खानपिनको व्यवस्था गर्ने निर्णय समेत मन्त्रिपरिषद्ले गरेको थियो ।

उपप्रधान तथा रक्षामन्त्री ईश्वर पोखरेल नेतृत्वको कोरोना प्रकोप नियन्त्रण उच्चस्तरीय समितिको सिफारिसमा सरकारले सिमानामा रहेका नेपालीलाई स्वदेश आउन दिने निर्णय गरेको थियो । उक्त निर्णय भएको तीन दिन बितिसक्दा पनि भारतबाट आउने नेपालीले प्रवेश पाएका छैनन् । दार्चुला लगायतका सीमा नाकामा नेपालीले प्रवेश नपाएर नाराबाजी र धर्नामा बस्न लागेका छन् ।

प्रकाशित : चैत्र १८, २०७६ १०:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×