कोरोना प्रकोप : कोरियामा ७ जनाको मृत्यु, ७ सय बढी संक्रमित  

देशैभर उच्च सतर्कता घोषणा
गोकुल थोकर

सोल — दक्षिण कोरियाले कोरोना भाइरस संक्रमितको संख्यामा वृद्धि भएपछि सतर्कता बढाएको छ । राष्ट्रपति मुन जाय–इनले कोरोना रोकथाम तथा नियन्त्रणका लागि ‘अभूतपूर्ण र शक्तिशाली कदम’ मा जोड दिँदै देशैभर उच्च सतर्कता बढाइएको घोषणा गरेका हुन् । 

दक्षिण कोरियाको थेगुस्थित एउटा स्थानीय बजारमा आइतबार कीटाणुनाशक पदार्थ छर्दै सुरक्षात्मक पोसाक लगाएका कामदार। तस्बिर ः एपी



‘सरकारले विज्ञका सुझावका आधारमा भाइरस नियन्त्रणका लागि पर्याप्त गृहकार्य र सतर्कता बढाएको छ,’ राष्ट्रपति मुनले भने । सन् २००९ को सार्स महामारीका बेला पनि सरकारी तवरमै सतर्कता बढाइएको थियो । सरकारी घोषणासँगै अस्थायी रूपमा विद्यालय बन्द गर्न र सार्वजनिक यातायातका साधनका साथै उडानका संख्या कटौती गर्नअधिकारीहरुलाई सजिलो हुनेछ। दक्षिण कोरियामा सोमबार बिहानसम्म७ सय६३ जना कोरोना संक्रमित पुष्टि भएका छन् भने७ जनाको मृत्यु भएको छ । आइतबार मात्रै थप १६१ जनामा काेराेनाकाे सक्रमण देखिएको छ।


नेपालीको दैनिकी प्रभावित


कोरोना संक्रमण फैलिन थालेदेखि दक्षिण कोरियामा बस्ने नेपालीको दैनिकी प्रभावित भएको छ । चीनबाट कच्चा पदार्थ आयात गर्ने र उत्पादन निर्यात गर्ने केही कम्पनी बन्द भएका छन् भने केही साताको दुई तीन दिन मात्रै सञ्चालित छन् । यस्ता कम्पनीमा काम गर्ने नेपाली दिनभर कोठामै बस्नुपर्दा वाक्क लागेको बताउँछन् । कम्पनीमै दिन कटाउनेमध्येमा पर्छन्, चितवनका शिवशंकर महतो । गाडीमा तेल हाल्ने पाइप निर्माण हुने उनी कार्यरत कम्पनीमा चीनबाट कच्चापदार्थ आयात हुने गरेकामा कोरोना संक्रमण फैलिएसँगै रोकिएको छ ।


कुनै सामान आयात भएका छैनन् । त्यसैले कम्पनीमा काम छैन । ‘काम नगरेको दुई साताभन्दा बढी भइसक्यो । बस्दा बस्दा वाक्क लाग्छ । बाहिर जान पाइएको छैन,’ महतोले भने । कम्पनीले काम नभएका दिनलाई कामदारको भइपरी आउँदा पाउने बिदामा कटौती गर्ने भनेकाले उनलाई चित्त नबुझे पनि उनले केही भनेका छैनन् ।


कोरोना भाइरसको केन्द्र मानिएको छाङ्दोस्थित एउटा कम्पनीमा काम गर्छन्, यम श्रीसमगर । उनको कम्पनी र छाङ्दो थेनम अस्पताल २० मिनेट पैदल दूरीमा छ । केही दिनअघि एकजना कोरोना संक्रमितको मृत्यु भएको उक्त अस्पताल नजिकैको छाङ्दो बजार उनीहरूको सामान किन्ने ठाउँ हो । यसकारण पनि उनको मनमा एक खालको डर प्रवेश गरेको छ । ‘हावा चल्दा पनि रोगको कीटाणु आयो कि जस्तो हुन्छ । वनको बाघले नखाए पनि मनको बाघले खान्छ भनेजस्तै भइरहेको छ ।’


महतोको कम्पनीजस्तो यमको कम्पनी पूर्ण रूपमै बन्द भइसकेको भने छैन, बेसिक काम भइरहेका छन् । कम्पनीले भाइरस नफैलियोस् भनेर रोकथामका विविध उपाय पनि अपनाएको छ । बिहान जाँदा सबैको ज्वरो हेरिन्छ । काम सुरु गर्नुअघि अल्कोहलयुक्त झोलले हात धुनु लगाइन्छ । काम गर्दा माक्स अनिवार्य छ । खाना खाँदा एउटै टेबलमा दुई जनाभन्दा बढी बस्न पाइँदैन । कोठामा पनि अनिवार्य मास्क लगाउनैपर्छ । सातामा एक पटक कोठा र कम्पनीमा भाइरसविरुद्धको ‘ग्यास’ छर्किने गरिएको छ । ‘यो सबै देख्दा रोग नलाग्ला जस्तो लाग्छ तर समाचार हेर्‍यो कि डर लाग्छ,’ उनी बताउँछन् ।


महतोको जस्तै हाल छ, युद्ध सलामीको पनि । बुसान नजिकै रहेको उनको कम्पनीमा गत साता तीन दिन मात्रै काम भयो । ‘हाम्रो कम्पनीलाई चाहिने सामान चीनबाट आउँछ रे । त्यही भएर काम छैन भन्छन् ।’ छुट्टी बसेको दिन कामदारले पाउने भइपरी बिदाबाट कटौती हुन्छ । ‘हामीलाई चाहिएको बेलामा प्रयोग गर्न पाइने बिदा कम्पनीले जबरजस्ती सही गराएर लगेको छ । कहिलेसम्म यसरी चल्छ थाहा छैन,’ सलामीले बताए । दक्षिण कोरियामा कामदारले वार्षिक रूपमा १५ दिन भइपरी बिदा पाउँछन् ।


सुरक्षित बस्न आग्रह


दक्षिण कोरियास्थित नेपाली दूतावासले आइतबार एक विज्ञप्ति प्रकाशित गर्दै सबै नेपालीलाई सुरक्षित तरिकाले बस्न आग्रह गरेको छ । उसले अवैधानिक रूपमा बसेकालाई पनि कोरोनाको शंका लागेमा स्वास्थ्य परीक्षणमा जान भनेको छ ।


‘हामीलाई यहाँको अध्यागमन विभागले अवैधानिक रूपमै बसेको भए पनि कोरोनाको उपचारमा कुनै प्रकारको अप्ठ्यारो नहुने व्यवहोराको पत्र पठाएको थियो । हामीले त्यही आधारमा विज्ञप्ति निकालेका हौं,’ दक्षिण कोरियाका लागि कार्यबाहक नेपाली राजदूत रामसिं थापाले भने, ‘अवैधानिक बसोबास गरेकालाई उपचारमा जाँदा कुनै परिचयपत्र आवश्यक नहुने र उनीहरूलाई कानुनी हैसियतबारे पनि सोधपुछ नहुनेअध्यागमन विभागले हामीलाई जानकारी दिएको छ ।’नेपालीले काम गर्ने कुनै पनि कम्पनीमा हालसम्म कोरोना संक्रमण नफैलिएको दूतावासले जनाएको छ । कुनै नेपाली घर बिदामा जान चाहे दूतावासले सहयोग गर्ने पनि थापाले बताए । ‘अहिलेसम्म कोरियाबाट घर बिदा जान केही समस्या छैन । कम्पनीले जान दिएन भने हामीलाई भन्दा हुन्छ । हामी सकेको सहयोग गर्छौं,’ थापाले भने ।


इरानमा मृत्यु हुनेको संख्या ८ पुग्यो


कोरोना भाइरसका कारण इरानमा मृत्यु हुनेको संख्या आठ पुगेको छ । स्वास्थ्य मन्त्रालयका अनुसार संक्रमितको संख्या ४३ पुगेको छ । भाइरस संक्रमितमध्ये धेरै कोम सहरका रहेका र चीनबाट आउने यात्रु हुँदै संक्रमण फैलिएको स्वास्थ्य मन्त्रालयका प्रवक्ता कियानोस जहानपोरले राज्य सञ्चालित टेलिभजनलाई बताए । भाइरस नफैलियोस् भनेर कोम सहरका सम्पूर्ण विद्यालय र धार्मिक सभासम्मेलन बन्द गरिएका छन् भने अन्य क्षेत्रका मानिसलाई त्यहाँ नजान भनिएको छ ।


यसैबीच, इटालीमा कोरोना संक्रमितको संख्या सय नाघेको छ । राज्य सञ्चालित टेलिभजनका अनुसार कोरोना भाइरसबाट इटालीमा आइतबारसम्म ११५ जना संक्रमित भएका छन् । इटालीको उत्तरी क्षेत्र लम्बार्डीमा मात्रै ८९ जना संक्रमित पाइएको गभर्नर एट्टिलियो फोन्टानाले आइतबार जानकारी दिएका छन् । संक्रमितको संख्यामा वृद्धि हुन थालेपछि सरकारले देशको उत्तरी क्षेत्रका लगभग दर्जनभन्दा बढी सहर बन्द गरेको छ।


चीन, दक्षिण कोरिया, इरान र इटालीबाहेक जापानको योकोहामा तटीय क्षेत्रमा रोकिएको क्रु पानीजहाजमा ६९० भन्दा बढी कोरोना संक्रमित पुष्टि भएका छन्। आइतबारसम्म कोरोनाका कारण विश्वभर ७८ हजारभन्दा बढी संक्रमित पुष्टि हुँदा चीनकै मात्र ७६ हजार ९३६ जना संक्रमित छन् । कोरोनाका कारण हालसम्म चीनमा सबैभन्दा धेरै दुई हजार ४४२ जनाको मृत्यु भएको छ ।


साेमबार बिहानसम्‍म चीनमा काेराेना भाइरसबाट मृत्यु हुनेको संख्या २ हजार ४ सय ४२ जना पुगेको छ। चीन बाहिर दक्षिण कोरियामा ७, इरानमा ८, जापानमा ४, इटालीमा २, हङकङमा २, ताइवानमा १, फ्रान्समा १, फिलिपिन्समा १ गरी २ हजार ४ सय ६८ जनाकाे मृत्यु भएको छ। चीन बाहिर काेराेनाकाे संक्रमणबाट मृत्यु हुनेको संख्या २६ जनाकाे मृत्यु भएको छ। अहिलेसम्‍म विश्वभर ७९ हजार १ सय ४० जना कोरोना भाइरसबाट सक्रमित बनेका छन् भने चीनमा मात्रै ७६ हजार ९ सय ३६ जना सक्रमित बनेका छन्। प्रकाशित : फाल्गुन १२, २०७६ ०८:३२

ADVERTISEMENT
ADVERTISEMENT
प्रतिक्रिया
पठाउनुहोस्

यी हुन् ओलीका घर

अर्जुन राजवंशी, चन्द्र कार्की

बिर्तामोड, तेह्रथुम — प्रधानमन्त्री केपी शर्मा ओलीले आइतबार ६९ औं जन्मदिन जन्मघर तेह्रथुमको आठराईमा मनाए । रित्तो जन्मघरबाहेक पनि ओलीका झापा र भक्तपुरको बालकोटमा घर छन् । यतिबेला प्रधानमन्त्री निवास बालुवाटार बसिरहेका उनले ५६ वर्षको झापा बसाइँमा जन्मदिन यसरी भव्य रूपमा कहिल्यै मनाएका थिएनन् । 

१२ वर्षको उमेरमा तेह्रथुमबाट झापा झरेका ओली अहिले भक्तपुर बालकोट निवासी बनिसकेका छन् । झापामा उनको पैतृक सम्पत्ति मात्र छ । तर, सर्वसाधारणले ओलीको घर भनेर दुइटा घरलाई चिन्ने गर्छन् ।

पृथ्वीनगरस्थित हिमालीचोकमा बुबा मोहनप्रसाद ओली र भाइ जयप्रसाद (जेपी) ओली बसोबास गर्ने घर र दमक नगरपालिकाका मेयर रोमनाथ ओलीको परिवार बसोबास गर्ने घर । तर, प्रधानमन्त्री ओलीकै नाममा झापामा घर छैन । उनको नामले चिनिने घरहरू आइतबार सुनसान रहे । बुबा मोहनप्रसाद पनि आठराई नै गएपछि हिमालीचोकको घर सुनसान थियो । मेयर ओली पनि सपरिवार आठराईमै जन्मदिनको कार्यक्रममा सरिक भएपछि दमकस्थित निवास सुनसान रह्यो ।

झापाको दमकस्थित प्रधानमन्त्री केपी शर्मा ओलीको घर
हिमालीचोकस्थित घर र १८ कट्ठा जमिन मोहनप्रसादका नाममा छ । दमकस्थित घर र जग्गा भने प्रधानमन्त्री ओलीले १७ वर्षअघि नै बेचिसकेका छन् । तर, अहिले पनि दमक–५ स्थित घर प्रधानमन्त्री ओलीकै निवास भनेर चिनिन्छ । ०५१ सालमा गृहमन्त्री भएका बेला ओलीले दमकमा एक कट्ठा १० धुर जमिन किनेर दुई तलाको नौ कोठे पक्की घर बनाएका थिए । जमिन ओलीको नाममा तथा घर पत्नी राधिका शाक्यका नाममा थियो । आर्थिक समस्या परेपछि ओलीले दमकको घरजग्गा ०५९ सालमा ललितपुरका व्यवसायी श्रीराम केसीलाई २० लाख रुपैयाँमा बिक्री गरेका थिए । जमिनसहितको घर खरिद गरे पनि केसीले उक्त घर प्रधानमन्त्री ओलीलाई नै प्रयोग गर्न दिँदै आएका छन् ।

उक्त घरमा २०५३ देखि दमकका नगर प्रमुख भएका रोमनाथ सपरिवार बस्दै आएका छन् । ०४४ सालमा जेलबाट रिहा भएपछि केपी ओलीले पृथ्वीनगरस्थित आफ्नो घरमा भन्दा पार्टी गतिविधिका क्रममा नेता/कार्यकर्ताकै घरमा बढी समय बिताए । भूमिगत बेला ओलीलाई दमककी तारादेवी ढकालले सेल्टर दिने गर्थिन् । उनकै घरमा बसेर ०४८ को आमनिर्वाचनमा झापा–६ बाट सांसदमा निर्वाचित भएका थिए । ०५१ को मध्यावधि निर्वाचन पनि ओलीले ढकाललगायतकै नेता/कार्यकर्ताको घरमा बसेर लडे । मध्यावधि निर्वाचनमा झापा–२ बाट प्रतिनिधिसभा सदस्यमा पुनः निर्वाचित भएपछि ओली ०५१ मंसिर १४ मा गठन भएको कम्युनिस्ट पार्टी नेतृत्वको सरकारको गृहमन्त्री नियुक्त भएका थिए । त्यसपछि भने दमकमा जमिन किनेर घर बनाएका थिए ।

भक्तपुरको बालकोटस्थित प्रधानमन्त्री ओलीको घर
अझै पनि झापा आउँदा उनी आफूले बेचेकै घरमा बास बस्छन् । ०५६, ०६४, ०७० र ०७४ को निर्वाचन त्यही घरमै बास बसेर लडे । तर, प्रधानमन्त्री भएपछि भने ओली दमकस्थित निवास पुगेका छैनन् । दमकस्थित ओली निवासलाई दुई वर्षदेखि नेपाल प्रहरी र सशस्त्रले आलोपालो २४ घण्टा सुरक्षा दिँदै आएका छन् । ओली बुवा र भाइ बसेको हिमाली टोलको घरमा भने जाने गरेका छैनन् ।

‘जन्मघरमा बर्थडे’
पुरानो घरको आँगनकै छेउमा आइतबार पहिलो पटक हेलिकप्टर उत्रँदा आठराई–४ इवाका गाउँले प्रधानमन्त्री केपी शर्मा ओली आएका होलान् भनेर नजिक जान खोजे । प्रहरी र सेनाले रोके– होइन यसमा प्रधानमन्त्री हुनुहुन्छ । सेनाको त्यो हेलिकप्टरबाट एउटा बाकस लिएर दुई जना उत्रिए । करिब १:१५ बजे अर्को हेलिकप्टर आयो । यसमा थिए ओली, श्रीमती राधिका शाक्य र पिता मोहनप्रसाद । दलबलसहित केही मिनेट ओली १२ वर्षको छँदा छाडेको घरमा पसे । माथि भकारी, एकातिर तल दाउरोको चुलो र अर्कातिर एउटा पलङ भएको घरमा भित्र धेरैबेर नअडिई आँगनमा आएका ओली दम्पती ग्रहशान्ति पूजामा करिब २० मिनेट सामेल भए ।

तेह्रथुमको आठराईमा रहेको प्रधानमन्त्री केपी शर्मा ओलीको पुर्ख्यौली घर

ओलीको जन्मघरमा लामो समयदेखि कोही थिएनन् । खानेपानीको समस्या र पहाडको दुःख खेप्न नसकेर इवाबाट एक समय बसाइँ जानेको लर्को लागेको थियो । घर कुरेर बसेका तामाङ परिवार पनि त्यही मेसोमा हिँडेपछि रुङेर बस्न गत सातामात्रै ओलीका नातामा भतिजा पर्ने दम्पती आएका छन् । उनीहरू पुरानो घरसँगैको अर्को नयाँ घरमा बस्छन् । ग्रहशान्तिको विधिपछि ओली र अन्य अतिथि त्यही नयाँ घरमा पसे । चिया–पानी खाए र नजिकै बनाइएको मञ्चमा पुगे । कडा सुरक्षा तैनाथीका बीचबाट भलाकुसारी गर्न गाउँलेहरू ओलीको नजिक जान पाउने अवस्था थिएन । ओलीले पनि दौंतरी खोजेर बोल्न–बोलाउन चासो देखाएनन् ।

ताप्लेजुङको ढुंगेसाँघुसम्म जोडिने ६५ किमि सडकको उनले शिलान्यास र छिमेकी गाउँ पाँचथरको कुम्मायकमा नवनिर्मित लिफ्ट खानेपानी आयोजना उद्घाटन गरे । कार्यक्रममा उनले सरकार विकास निर्माणका काममा ‘आक्रामक रूपले अघि बढिरहेको’ बताए ।
कृषि प्राविधिक शिक्षालय सञ्चालनका लागि कानुनी प्रक्रिया पूरा भइसकेको भन्दै चालु आर्थिक वर्षभित्र काम अघि बढ्ने बताए । ‘भारी नपुगेर’ कृषि उत्पादनले बजार नपाएको भन्दै ओलीले पर्याप्त मात्रामा इस्कुस, बेमौसमी तरकारी, फलफूललगायत कृषि उपज फलाउन आह्वान गरे । भाषणपछि सुरुको हेलिकप्टरले ल्याएको बाकस मञ्चमा खोलियो । त्यसमा देशको चित्र अंकित ‘बर्थडे केक’ थियो । ओलीले जन्मोत्सवका अवसरमा केक काटे । बुवा र श्रीमती राधिकालाई खुवाए । राधिकाले ओलीलाई खुवाइन् । त्यसपछि मञ्चमा आसीनहरूले ओलीलाई शुभकामना दिए । ओलीले उपहार बाँडे । गाउँले, पार्टीको जिल्ला र विभिन्न कमिटीले ल्याएका ज्ञापनपत्र ग्रहण गरे ।


ओलीले जन्मथलोमै आएर जन्मोत्सव मनाउन पाउँदा हर्षित भएको बताए । आठराई क्षेत्रका चार सय ज्येष्ठ नागरिकलाई न्यानो कपडा र दुई हजार विद्यार्थीलाई शैक्षिक सामग्री वितरण गरे । घरको अवलोकन गरे । बुवा मोहनप्रसाद र पत्नी राधिकाका साथ जन्मघरको सिकुवाको डिलमा बसेर तस्बिर खिचाए । संक्रान्ति बजारमा पुनःस्थापना गरिएको नेपाल बैंकको शाखाको पनि उद्घाटन गरे । गाउँ–गाउँमा विकासको लहर सरकारले ल्याएको भन्दै प्रधानमन्त्री ओलीले तमोरको पानी तानेर जन्मगाउँमा सिंचाइको व्यवस्था गर्ने आश्वासन दिए । खानेपानी आयोजनाका लागि विद्युतमा सहुलियत दिने बताए ।

प्रकाशित : फाल्गुन १२, २०७६ ०८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×