हङकङ — हङकङमा कोरोना भाइरसका कारण मंगलबार एक जनाको मृत्यु भएको छ । कोरोना भाइरसका कारण चीनबाहिर मृत्यु भएको यो दोस्रो घटना हो । यसअघि आइतबार फिलिपिन्समा पनि कोरोना भाइरसका कारण एक जनाको मृत्यु भएको थियो ।
हङकङमा कोरोना भाइरसका कारण मृत्यु भएका व्यक्तिको बारेमा विस्तृत जानकारी आइसकेको छैन ।
मंगलबार बिहानसम्म कोरोना भाइरसका कारण मृत्यु हुनेको संख्या ४२७ पुगेको छ । जसमध्ये ४२५ को मृत्यु चीनमै भएको छ ।
सोमबार मात्रै चीनमा थप ३ हजार २ सय ३५ मा कोरोना भाइरसको संक्रमण देखिएको छ । मंगलबार बिहानसम्म २० हजार ४ सय ३८ चिनियाँ नागरिकमा यसको संक्रमण देखिएको छ । विश्वका विभिन्न मुलुकमा कम्तीमा १८० जनामा कोरोना भाइरसको संक्रमण देखिएको पुष्टि भइसकेको छ ।
