खसोग्गीको हत्या पूर्वनियोजित : टर्की

साउदी अरबले खसोग्गीको मृत्यु टर्कीस्थित महावाणिज्य दूतावासभित्र ‘दुर्घटनावश’ भएको बताएपछि टर्कीका राष्ट्रपतिको यस्तो प्रतिक्रिया आएको हो ।

गत २ अक्टोबरमा टर्कीस्थित साउदी अरबको महावाणिज्य दूतावासमा प्रवेश गरेका खसोग्गी बेपत्ता भएका थिए । खसोग्गीको हत्या साउदी वाणिज्य दूतावासमै भएको प्रमाण आफूसँग भएको दाबी टर्कीको छ । यससम्बन्धी सत्यतथ्य विश्वसामुन्ने ल्याउने इर्दोगानले बताए ।

साउदी अरबले सुरुमा खसोग्गी हत्यामा आफ्नो संलग्नता अस्वीकार गरे पनि पछि दूतावासभित्र भएको झगडामा मारिएको बताएको थियो । साउदी अरबका विदेशमन्त्री अदेल जुबेरले खसोग्गी मारिनु ‘भूल’ भएको बताए पनि त्यसमा साउदी राजकुमार मोहम्मद बिन सलमानको भूमिका नभएको बताएका थिए । उनले हत्याका लागि अनियन्त्रित एजेन्ट जिम्मेवार भएको बताएका छन् ।

राष्ट्रपति इर्दोगानले हत्याअघि १५ साउदी नागरिकहरू ३ वटा समूह बनाएर अलग–अलग उडानबाट इस्तानबुल आइपुगेको बताएका छन् । तीमध्ये ३ जना दूतावासका अधिकारीहरू भएको इर्दोगानको दाबी छ ।