काठमाडौँ — मौसम पूर्वानुमान महाशाखाले पहाडी भेगमा यस वर्ष कम पानी पर्ने, गर्मी धेरै हुने सूचना जारी गरेको छ । कम पानी पर्ने पूर्वानुमान प्रि-मनसुनमै धेरै पानी परिसकेकाले गरिएको हो ।

प्रत्यक्ष रूपमा प्रि-मनसुन र मनसुनको त्यति धेरै सम्बन्ध नहुने भएकाले कम वर्षा हुने सम्भावना धेरै त छ, तर पूर्वानुमानविपरीत यो वर्ष ठूलो वर्षा हुन पनि सक्छ । धेरै पानी परे बाढी, पहिरो, डुबान, चट्याङ जस्ता विपद्का घटना हुन सक्छन् भने कम परे खडेरी, लुजस्ता विपद् आउन सक्छन् ।

यस्ता विपद्को पूर्वतयारी र प्रतिकार्यमा मौसम पूर्वानुमान महाशाखा, राष्ट्रिय विपद् जोखिम न्यूनीकरण तथा व्यवस्थापन प्राधिकरण, तीनै सुरक्षा निकायले काम गर्छन् । प्रदेश तह, जिल्ला प्रशासन कार्यालय र स्थानीय तहमा आपत्कालीन कार्य सञ्चालन केन्द्र, मनसुन प्रतिकार्य कमान्ड पोस्ट, निजी क्षेत्र तथा अन्य निकायहरूसँगको समन्वयमा हुने गरेको छ । 

विपद्को पूर्वतयारी र प्रतिकार्यका लागि विभिन्न सरकारी कोषमा करिब ७ अर्ब ५६ करोड २३ लाख रुपैयाँ मौज्दात छ । गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले सबै तहका कोषमा मौज्दात रकमको अवस्था के छ ? अपुग भए रकम माग गर्न सूचना जारी गरेको छ । विपद् प्रतिकार्यमा कुनै कमी कमजोरी हुन नदिन प्राधिकरणले कार्ययोजना नै बनाएको छ । जसमा जिम्मेवारी बाँडफाँडदेखि विपद्‌मा जिम्मेवार व्यक्ति र निकायको सम्पर्क नम्बर पनि सार्वजनिक भएको छ ।