काठमाडौँ — छोरा हुर्किएपछि मात्रै छोडिगएको पुरानो रहर ब्युँतिएजस्तो भएको छ, असनकी सरिता मानन्धरलाई । नामबाट तपाईंले उनलाई चिन्नुभएको छैन भने पनि केही छैन । सामाजिक सञ्जाल चलाइरहनु हुन्छ भने तपाईंले 'बेमान बच्चा' भन्ने थेगो त पक्कै सुन्नुभएकै होला । उनै बेमान बच्चा अर्थात् श्रीशेष मानन्धरकी आमा हुन् सरिता । सरिता र श्रीशेष सामाजिक सञ्जालमा अनेकन हास्य र व्यंग्य मिसिएका भिडियो बनाउँछन् ।

सरिताको पढाइ १२ कक्षापछि रोकियो । किनकी २२ वर्षमै उनको बिहे भयो । स्कुले जीवनमा नाटकमा अभियन गर्दा गर्दै उनको रुचि कला क्षेत्रमा थियो । तर बिहे गरेकै अर्को वर्ष श्रीशेष जन्मिएपछि उनका रहर त्यसै हराए । ‘पढाइ सकिने बित्तिकै बिहे भयो । पढ्छु भनेको पनि पढ्न सकिनँ । बच्चा भइहाल्यो,’ उनले भनिन्, ‘उसलाई हेर्ने, स्कुल पठाउने, स्कुलबाट आउने अनि अर्को बच्चा भयो ।’

सरिताको मनको कुनै कुनामा लुकेर बसेको पुरानो रहर झन्डै दुई दशकपछि छोरा श्रीशेषले पूरा गरिदिए । अहिले आमा–छोराले अभिनय गर्दै बनाउने अनेकन छोटा भिडियोहरु सामाजिक सञ्जालमा लाखौंले मन पराइरहेको देख्न पाइन्छ । श्रीशेष र सरितालाई सामाजिक सञ्जालमा ल्याउने काम भने लकडाउनले गर्‍यो । ‘लकडाउनको बेलामा छोराले भिडियो बनाउन सुरु गर्‍यो,’ सरिताले भनिन्, ‘पुरानो सपना छोराले पूरा गरिदियो ।’