पार्टी संसदीय दलको निर्वाचनमा केन्द्रित हुँदै छु : कांग्रेस महामन्त्री थापा- भिडियो - कान्तिपुर समाचार
कान्तिपुर वेबसाईट
AdvertisementAdvertisement

पार्टी संसदीय दलको निर्वाचनमा केन्द्रित हुँदै छु : कांग्रेस महामन्त्री थापा

कान्तिपुर संवाददाता

काठमाडौँ — नेपाली कांग्रेसका महामन्त्री गगनकुमार थापाले आफू पार्टी संसदीय दलको निर्वाचनमा केन्द्रित रहेको बताएका छन् । प्रधानमन्त्री बन्ने तयारीमा रहेका महामन्त्री थापाले पार्टी संसदीय दलको नेता चयन प्रक्रियामा आफू लागि परेको बताएका हुन् ।

महिला सुरक्षा दबाब समूह, नेपालले बुधबार काठमाडौंमा आयोजना गरेको कार्यक्रममा उनले मंसिर १५ गते शुक्रबारसम्म आफ्नो निर्वाचन क्षेत्रका मतदातालाई धन्यवाद दिने कार्यक्रम रहेको उल्लेख गर्दै त्यसपछि संसदीय दलको नेता चयनको निर्वाचनमा लाग्ने बताए । उनले मन्त्रिपरिषद्‌मा ३३ प्रतिशत महिला सहभागिता हुनेगरी कानुन निर्माण गर्न आफू प्रतिबद्ध भएर लागिपर्ने आश्वासन पनि दिए ।

‘मेरो त अर्को चुनाव आउँदैछ । मैले त्यो काममा केन्द्रित हुनुछ । केही दिनमा नयाँ मन्त्रिपरिषद् बन्छ । हाम्रो कानुनमा मन्त्रिपरिषद्‌भित्र महिलाको प्रतिनिधित्व यति हुनैपर्छ भनेर बोलेको छैन । तर, संसद्‌मा हामी ३३ प्रतिशत महिला प्रतिनिधित्व गराउनुपर्ने भएकाले अब १/२ जनाभन्दा बढी पुरुषहरु पर्दैनन् तर मन्त्रिपरिषद्‌मा कानुनी व्यवस्था नभएकाले मुस्किलले एक जना महिला समावेश हुने गरेका छन्, ' उनले भने, 'अब संसद्‌मा र मन्त्रिपरिषद्‌मा महिला सहभागिता बढाउन निर्वाचन कानुन बदल्न सुरु गरौं । म अहिल्यै भन्न सक्छु–मन्त्रिपरिषद्‌मा ३३ प्रतिशत महिला सहभागिता हुने कानुन हामीले बनाउनै पर्छ ।’

उनले थपे, 'प्रत्यक्ष निर्वाचन प्रणालीमा पनि ३३ प्रतिशत महिला उम्मेदवारी दिनुपर्ने कानुन हामीले बनाउनै पर्छ । यो कुरा अहिलेदेखि नै छलफल गर्दै गयो भने आगामी निर्वाचनसम्म त्यो काम हुन्छ । पुसमा नयाँ मन्त्रिपरिषद् बन्छ । माघबाटै सो कानुन बनाउने काम लागौं ।'

महामन्त्री थापाले सबै राजनीतिक दलहरुले प्रत्यक्षतर्फको निर्वाचनमा पनि ३३ प्रतिशत महिला अनिवार्य उम्मेदवार उठाउनुपर्ने गरी निर्वाचन कानुन संशोधन गर्ने काममा ढिलाई गर्न नहुने दोहोर्‍याए । महिलामाथि हुने सबै प्रकारको हिंसा अन्त्यका लागि घरघरमै अभियान संचालन गर्नुपर्ने उनको भनाइ थियो ।

प्रकाशित : मंसिर १४, २०७९ १८:०४
प्रतिक्रिया
पठाउनुहोस्

गोर्खा परिवारको महामारी अनुभव सार्वजनिक

कान्तिपुर संवाददाता

काठमाडौँ — यूकेमा रहेर साहित्य लेखनमा सक्रिय लिला सेलिङ माबोको 'मेमोयर्स अफ गोर्खा वाइफ ड्युरिङ लकडाउन' सार्वजनिक भएको छ ।

विश्व नेपाली साहित्य महासंघ यूकेद्वारा आयोजित ११२औं अन्तर्राष्ट्रिय श्रमिक महिला दिवसको अवसरमा उक्त कृति सिार्वजनिक गरेको हो ।

बेलायतको अथर हाउसले प्रकाशन गरेको उक्त कृति कोरोना महामारी र त्यसको असरमाथि केन्द्रित छ । साथै गोर्खा भारत सैनिकको श्रीमतिको रुपमा भोग्नु परेका अनुभव र पीडालाई लेखक लिलाले पुस्तकमा समेटेकी छन् ।

यस्तै नेपालमा रहेको आफ्नो थातथलो र संस्कृति र जीवनशैलीलाई पनि कृतिमा उल्लेख छ । यस्तै बेलायतमा दक्षिण एसियाली अल्पसंख्यक समुदायको अवस्था लगायत विषय पनि कृतिमा समेटिएका छन् ।

अंग्रेजी भाषामा लेखिएको उक्त पुस्तक लीलाको दोस्रो कृति पनि हो । यस कृतिमा उनले महामारीका कारण बेलायतमा नेपाली समुदायले भोग्नु परेका पीडा र भोगाइलाई संस्मरणात्मक डायरीको रुपमा लेखेकी हुन् ।

नेपालको पाँचथरस्थित ओयाममा पुर्ख्यौली घर भएकी माबो सन् २००० देखि बेलायतमा रहँदै आएकी छन् । उनी किरात याक्थुङ चुम्लुङ, नेपाल आदिवासी जनजाति महासंघ, फोनिज यूके, लगायत संस्थाहरूसँग आबद्ध रहेर सामाजिक अभियानमा सक्रिय छिन् ।

प्रकाशित : मंसिर १४, २०७९ १८:०४
पूरा पढ्नुहोस्
प्रतिक्रिया
पठाउनुहोस्
×