'प्रचण्ड सबै अस्थिरताको कारक हो, यो रहँदासम्म देशले सुख पाउँदैन भन्ने मान्छे पनि छन्'- भिडियो - कान्तिपुर समाचार
कान्तिपुर वेबसाईट
AdvertisementAdvertisement

'प्रचण्ड सबै अस्थिरताको कारक हो, यो रहँदासम्म देशले सुख पाउँदैन भन्ने मान्छे पनि छन्'

'कैयौं प्रधानमन्त्रीहरूले भन्ने गरेको तपाईं- हामीले सुनेका छौं 'म भ्रष्टाचार गर्दिनँ, गर्न पनि दिन्न' भन्ने साइनबोर्ड टाँग्ने, त्यो साइनबोर्डभित्र भ्रष्टाचारबाहेक गर्दै नगर्ने'
कान्तिपुर संवाददाता

काठमाडौँ — 'भ्रष्टाचार गर्दिनँ, गर्न पनि दिन्न' भन्ने साइनबोर्ड राखेर भित्र भ्रष्टाचारबाहेक केही पनि नगर्ने व्यक्तिहरू मुलुक सञ्चालनमा रहेको माओवादी केन्द्रका अध्यक्ष पुष्पकमल दाहालले बताएका छन् । उनले मुलुकबाट भ्रष्टाचार अन्त्य गर्नका लागि निर्वाचन प्रणाली र शासकीय स्वरुपमा परिवर्तन गर्नुपर्ने बताएका छन् । 

नेपाल उद्योग व्यापार महासंघको प्रथम केन्द्रीय महाधिवेशनलाई बिहीबार काठमाडौंमा सम्बोधन गर्ने क्रममा दाहालले मुलुकमा संरचनागत सुधार गरेर आर्थिक सुधारमा जानुपर्ने बताएका हुन् । निर्वाचन प्रणाली र शासन प्रणालीमा सुधार गरेर अहिले व्याप्त विसंगती, विकृति, कुशासन र भ्रष्टाचार नियन्त्रण गरी देशलाई एकताबद्ध गरेर समृद्धिमा जान सकिन्छ भन्ने आफूलाई विश्वास रहेको उलने बताए ।

संरचनामा देखिएका विकृति र विसंगतीलाई सुधार गर्नका लागि आफू लाग्ने दाहालको भनाइ थियो । शान्तिपूर्ण छलफल र बहसको तरिकाले सामाजिक जीवनका सबै क्षेत्र र समुदायको सहभागितासहित अगाडि बढ्नुपर्ने र त्यसका लागि आवश्यक पर्दा सडकमा पनि जानुपर्ने अवस्था आउने उनले भनेका छन् । 'कैयौं प्रधानमन्त्रीहरूले भन्ने गरेको तपाईं-हामीले सुनेका छौं 'म भ्रष्टाचार गर्दिनँ, गर्न पनि दिन्न' भन्ने साइनबोर्ड टाँग्ने, त्यो साइनबोर्डभित्र भ्रष्टाचारबाहेक गर्दै नगर्ने,' दाहालले भने, 'के कारणले यो भइराखेको छ ? यो व्यक्तिको मात्रै दोष हो कि, यो प्रणालीमा कहिँ खोट छ ? आज हामी सबैले विचार गर्नुपर्ने विषय हो ।'

राज्यका संचालनका लागि स्थापना गरिएका संरचनाले काम गर्दा समस्या आएको हो कि भन्ने दाहालको भनाइ थियो । 'हामीसँग मेसिनरी ठिक भएन भने पनि लाग्छ । जस्तो चिज हालेपनि त्यो मेसिनले आफ्नो आकार, प्रकार र गुणचरित्र अनुसारकै परिणाम दिन्छ । राम्रो हाले पनि निक्लिने बेलामा नराम्रो निक्लिन्छ । प्रणालीमा सुधार गर्नुपर्छ । त्यसो गर्न सकिन्छ,' उनले भने ।

त्यस्तै, दाहालले माओवादीले लोकतान्त्रिक गणतन्त्र, समावेशी, समानुपातिक व्यवस्था तथा सबैले अधिकार पाउनुपर्‍यो भन्दा मन नपराउने मान्छे रहेको बताए । 'प्रचण्ड भनेपछि सबै अस्थिरताको कारक यही हो, यो रहँदासम्म देशले सुख पाउँदैन भन्ने मान्छे पनि छन् । माओवादी र माओवादी नेतृत्व रहँदासम्म बुर्जुवा, दलाल, भ्रष्टहरूलाई चैनमा बस्न दिइँदैन,' उनले भने ।

प्रकाशित : भाद्र ३०, २०७९ १७:३१
प्रतिक्रिया
पठाउनुहोस्

१०६१ मेगावाटको अपर अरुणमा एचआईडीसीएलले ५३ अर्ब लगानी गर्ने

कान्तिपुर संवाददाता

काठमाडौँ — रुपान्तरणकारी आयोजनाको रुपमा रहेको १०६१ मेगावाट उत्पादन क्षमताको अपर अरुण जलविद्युत् आयोजनामा सरकारी कम्पनी हाइड्रोइलेक्ट्रिसिटी एन्ड डेभलपमेन्ट कम्पनी लिमिटेड (एचआईडीसीएल) ले लगानी गर्ने भएको छ ।नेपाल विद्युत् प्राधिकरणको सहायक कम्पनीका रुपमा रहेको अपर अरुण हाइड्रो–इलेक्ट्रिक कम्पनीबाट प्रवर्द्धन तथा विकास भइरहेको यो आयोजनामा एचआईडीसीएलले ५३ अर्ब १५ करोड रुपैयाँ बराबर लगानी गर्ने भएको हो ।


अपर अरुण हाइड्रोइलेक्ट्रिसिटी लिमिटेड (युएएचईएल) र एचआइडीसीएलको सहवित्तीयकरणमा लगानी गर्नेसम्बन्धी बिहीबार सम्झौता हुँदैछ । हालसम्मको अध्ययन अनुसार आयोजनाको कुल लागत अनुमान निर्माण अवधिको ब्याज, मूल्यवृद्धि सहित १ अर्ब ७५ करोड अमेरिकी डलर (करिब २ खर्ब १४ अर्ब नेपाली रुपैयाँ) रहेको छ । कर बाहेक आयोजनाको कुल लागत १ अर्ब ३८ करोड अमेरिकी डलर बराबर अनुमान गरिएको छ ।

आयोजना निर्माणका लागि वित्तीय व्यवस्थापन सहुलियत ऋण तथा सेयर लगानीवाट गरिने छ । हाल अर्थ मन्त्रालयको नेतृत्वमा आयोजनाको लागि ऋण लगानी जुटाउन समन्वय भइरहेको छ । आयोजनाको अध्ययनका लागि आर्थिक सहयोग गरिरहेको विश्व बैंकले आयोजना निर्माणको लागी ऋण लगानी गर्ने आशय व्यक्त गरेको छ । यही परिपेक्षमा विदेशी वित्तीय संस्थाहरुबाट ऋण लगानी जुटाउन विश्व बैंकको नेतृत्वमा पहल भइरहेको छ भने स्वदेशी लगानीतर्फ जलविद्युत् लगानी तथा विकास कम्पनी नेतृत्वको सहवित्तीयकरणमार्फत् ५३ अर्ब १४ करोड लगानी गर्ने समझदारी पत्रमा हस्ताक्षर हुँदैछ ।

सन् २०२४ को अन्त्यतिर सुरु भई सन् २०३० को अन्त्यसम्ममा सम्पन्न गर्ने लक्ष्य रहेको यस आयोजनाको हाल सम्भाव्यता अध्ययन कार्य सम्पन्न भई टेन्डर डिजाइन तथा निर्माण सुपरिवेक्षण कार्यको लागि परामर्शदाता छनोट गर्ने कार्य भइरहेको छ । आयोजनाको पूर्व तयारी कार्यमध्ये २१ किलोमिटर लामो पहुँचमार्ग निर्माणको लागि बोलपत्रदाता छनोट गर्न प्राप्त बोलपत्रहरुको मूल्यांकन कार्य भइरहेको छ भने आयोजनाको लागि आवश्यक करिब २२५ हेक्टर जग्गाको मुआब्जा निर्धारण भई वितरण गर्ने क्रममा छ । आयोजनाबाट करिब २२ घरधुरी भौतिक रुपमा विस्थापित हुनेछन् भने आयोजनाको निर्माणबाट वातावरणीय तथा सामाजिक प्रभाव तुलनात्मक रुपमा न्यून रहेको अध्ययनबाट देखिएको छ । पहुँच मार्गको निर्माण कार्य सन् २०२३ को पुर्वार्द्धबाट सुरु गर्ने योजना छ ।


संखुवासभा जिल्ला भोटखोला गाउँपालिकामा अवस्थित यस पिकिङ रन–अफ–रिभर आयोजनाको हालसम्मको अध्ययन अनुसार अरुण नदीमा १८३ मिटर लामो र करिब १०० मिटर उचाइको बाँध निर्माण गरी ८.५ किलोमिटर लामो सुरुङमार्फत् पानी ल्याई छोंग्राकस्थित भूमिगत जलविद्युत् गृहमा खसालिने छ । आयोजनाबाट वार्षिक करिब ४५१२ गिगावाट आवर अर्थात ४ अर्ब ५१ करोड युनिट विद्युत् उत्पादन हुनेछ । उत्पादित विद्युतलाई पावर हाउसदेखि करिव ६ किलोमिटर ४०० के.भी. डबल सर्किटको प्रशारण लाइन निर्माण गरी हाइटार संखुवासभास्थित सबस्टेसनमा जोडिने योजना छ ।

प्रकाशित : भाद्र ३०, २०७९ १७:२६
पूरा पढ्नुहोस्
प्रतिक्रिया
पठाउनुहोस्
x
×