टीएमटीजीले सेवा सार्वजनिक हुनुअघि नै केही ग्राहकसँग सम्झौता भइसकेको दाबी गरेको छ । ट्रुथ सोसलले आफ्ना प्रयोगकर्ताको आधिकारिक संख्या सार्वजनिक गरेको छैन । ‘ट्रुथ सोसलका पोस्टले बजारलाई प्रभावित पार्दै आएको छ,’ टीएमटीजीका कार्यवहाक प्रमुख कार्यकारी अधिकृत केभिन म्याकगर्नले भनेका छन्, ‘ट्रुथ एपीआईले ट्रुथ सोसलका पोस्टमा प्रत्यक्ष र रियल-टाइम पहुँच दिन्छ ।’

यो योजनाप्रति अमेरिकी डेमोक्र्याट सांसदहरूले आलोचना गरेका छन्। ‘राष्ट्रपति ट्रम्पले आफ्ना सामाजिक सञ्जाल पोस्टमा आम लगानीकर्ताभन्दा पहिले पहुँच दिएर वाल स्ट्रिटका व्यापारीलाई त्यसबाट नाफा कमाउने अवसर बेचिरहेका छन्,’ सिनेटर रोन वाइडेनलाई उद्धृत गर्दै रोयटर्सले जनाएको छ । सिनेटर एलिजाबेथ वारेनले पनि यस व्यवस्थामाथि थप छानबिन हुनुपर्ने बताएकी छन् ।

रोयटर्सका अनुसार कानुनी विज्ञहरूले सार्वजनिक रूपमा प्रकाशित हुने सूचनामा तहगत पहुँच (टियर्ड एक्सेस) दिनु हालको अमेरिकी धितोपत्र कानुनअनुसार सामान्यतः वैध हुने बताएका छन् । तर, नैतिकता रूपमा भने पदासीन राष्ट्रपतिका बजारमा प्रभाव पार्ने अभिव्यक्तिलाई व्यावसायिक उत्पादन बनाइनु उपयुक्त हो वा होइन भन्ने प्रश्न उठेका छन् ।