काठमाडौँ — विश्वकै सबैभन्दा चर्चित र धेरै प्रतीक्षा गरिएको भिडियो गेममध्ये एक,  ग्रान्ड थेफ्ट अटो-६ (जीटीए-६) आगामी नोभेम्बर १९ मा सार्वजनिक हुने भएको छ । गेमको अघिल्लो संस्करण आएको १२ वर्षभन्दा बढी समयपछि नयाँ संस्करण ल्याउने घोषणा गरिएको हो । 

जीटीए-६ को स्ट्यान्डर्ड संस्करणको मूल्य ७९.९९ अमेरिकी डलर (करिब ११ हजार ८४० रुपैयाँ) र अल्टिमेट संस्करणको मूल्य ९९.९९ अमेरिकी डलर (करिब १४ हजार ८०० रुपैयाँ) तोकिएको छ । यसपटक अघिल्ला पटकजस्तो गेमको डिस्क भने नहुने भएको छ । त्यसमा डिजिटल डाउनलोड कोड मात्र हुनेछ । 

गेमको नया संस्करण विकास गर्न र अनुभव सुधार गर्न थप समय आवश्यक परेको भन्दै गेम सार्वजनिक मिति कैयौँपटक सारिएको थियो । सन् २०१३ मा सार्वजनिक भएको जीटीए-५ को व्यापक सफलतापछि यसको नयाँ संस्करण आउन लागेको हो । जीटीए-५ हालसम्म करिब २३ करोड प्रति बिक्री भइसकेका छन् । यसलाई विश्वकै सबैभन्दा धेरै बिक्री हुने भिडियो गेम मानिन्छ । 

ग्रान्ड थेफ्ट अटो शृंखलाका कुल ४७ करोडभन्दा बढी प्रति बिक्री भइसकेका छन् । आधिकारिक बिक्रीसँगै जीटीए सिरिजका गेमहरूलाई टेक टाइम्स र इन्फर्मेटिक्स जर्नलले विश्वकै सबैभन्दा बढी पाइरेसी हुने गेमसमेत मान्ने गरेका छन् । टोरेन्ट प्लाट्फर्महरूमा यस गेमको अत्यधिक माग हुने भएकाले अनाधिकृत डाउनलोड पनि करोडौंमा हुने अनुमान गरिन्छ ।  

फ्लोरिडाबाट प्रेरित काल्पनिक अमेरिकी राज्य ‘लियोनिडा’मा आधारित जीटीए-६ ले उत्साहित गेमरहरूलाई फेरि भाइस सिटीमा फर्काउनेछ। खेलका मुख्य पात्र जेसन र लुसिया हुन् । फाइनान्सियल टाइम्सका बजार विश्लेषकहरूले पहिलो वर्षमै जीटीए-६ का ३ करोड ८० लाखदेखि ४ करोड प्रति बिक्री हुने र ३ अर्ब अमेरिकी डलरसम्म आम्दानी हुन सक्ने अनुमान गरेका छन् ।

जीटीए शृंखलाको मुख्य संस्करणमा पहिलोपटक लुसिया महिला प्रमुख पात्रका रूपमा देखिनेछिन्। सुरुआती चरणमा यो खेल प्लेस्टेसन–५ र एक्सबक्स सिरिज एक्स/एस मा मात्रै उपलब्ध हुनेछ। अनलाइन मल्टिप्लेयर संस्करण र अन्य विकल्पबारे भने तत्काल कुनै घोषणा गरिएको छैन। डिस्कको सट्टा डाउनलोड कोड दिने रकस्टारको निर्णयले प्रिमियम भिडियो गेमसमेत डिजिटल वितरणतर्फ तीव्र रूपमा अघि बढिरहेको प्रवृत्तिलाई देखाएको छ ।