काठमाडौँ — सामाजिक सञ्जाल प्लाटफर्महरूले बालबालिकालाई जानाजान स्क्रिनमा अल्झाइरहेको हो कि होइन भन्ने प्रश्न उठाइएको मुद्दामा मेटाका प्रमुख कार्यकारी अधिकृत मार्क जुकरबर्गले बयान दिने भएका छन् ।

‘केजीएम’नामले चिनिने २० वर्षीया एक युवतीले दायर गरेको मुद्दामा अमेरिकी समयअनुसार बुधबार जुकरबर्ग अदालतमा उपस्थित हुन लागेका हुन् । 

ती युवतीले सामाजिक सञ्जाल प्रयोग गर्दा बाल्यकालमै आफूलाई प्रविधिको लत लागेको र त्यसले चरम निराशा एवं आत्महत्याको विचार निम्त्याएको दाबी गरेकी छन् । यस मुद्दामा हाल मेटा प्लाटफर्म्स र गुगलको युट्युब प्रतिवादी रहेका छन् । टिकटक र स्न्यापच्याटले भने मिलापत्र गरेका छन् ।

जकरबर्गले यसअघि पनि अदालतमा विभिन्न विषयमा बयान दिइसकेका छन् । उनले मेटाका प्लाटफर्ममा किशोरकिशरोरीको स्वास्थ्य सुरक्षाबारे अमेरिकी संसदीय सुनुवाइमा पनि जवाफ दिएका थिए । ती सुनुवाइका क्रममा उनले सामाजिक सञ्जालकै कारण आफ्नो जीवनमा वियोग आइपरेको गुनासो गर्ने परिवारसँग क्षमा मागेका थिए । यसपालिको मुद्दामा उनी पहिलोपटक जुरीको अगाडि उभिँदै छन् । अदालतमा पीडित अभिभावकहरूको पनि उपस्थित रहने अपेक्षा गरिएको छ ।

यो मुद्दा, ‘बेलवेदर ट्रायल’ अर्थात् ठूलो संख्यामा दायर भएका समान प्रकृतिका मुद्दामध्ये प्रतिनिधि मुद्दाका रूपमा चयन गरिएको हो । यस मुद्दामा हुने फैसला सामाजिक सञ्जाल कम्पनीहरूविरुद्ध दायर गरिएका २६ सयभन्दा धेरै समान प्रकृतिका मुद्दाहरूका लागि नजिर बन्नेछ । यसले सामाजिक सञ्जालको ‘डिजाइन आर्किटेक्चर’ वा बनोटमै फेरबदल ल्याउने अनुमान गरिएको छ । अमेरिकाको लस एन्जलसस्थित काउन्टी सुपेरियर अदालतमा जारी सुनुवाइमा फेसबुक र युट्युबका प्रमुखले न्यायाधीश र जुरी (सर्वसाधारण नागरिकको एउटा समूह) समक्ष बयान दिइरहेका छन् । 

अमेरिकी सञ्चारमाध्यमहरूका अनुसार मेटाका एक प्रतिनिधिले यस मुद्दामा लगाइएका आरोप पुष्टि नहुने र तिनमा कम्पनी पूर्ण असहमत रहेको बताएका छन् । केजीएमले मानसिक स्वास्थ्यसम्बन्धी समस्या भोगेको कुरामा दुई मत नभए पनि ती समस्या निम्त्याउन इन्स्टाग्रामले खासै भूमिका नखेलेको मेटाका वकिल पल स्टिम्टको दाबी छ । उनले मेडिकल रेकर्डहरूलाई प्रमाणस्वरुप पेश गर्दै केजीएमको पारिवारिक जीवन पहिलेदेखि नै कहलपूर्ण रहेको जिकिर गरेका छन् । ती युवतीले आफ्नो मानसिक संघर्षबाट उम्किन वा त्यसलाई सामना गर्न सामाजिक सञ्जाल प्लाटफर्मलाई सहारा बनाएको मेटा र युट्युब दुवैका वकिलले तर्क गरेका छन् ।