मेटाले यस पेटेन्टसँग सम्बन्धित कुनै व्यावसायिक वा व्यवहारिक पक्षबारे घोषणा भने गरेको छैन । कम्पनीले फेसबुक र इन्स्टाग्राममा प्रयोगकर्ताको मृत्युपछि प्रोफाइल सुरक्षित राख्ने तर सक्रिय अन्तरक्रिया सिमित गर्ने गरी ‘स्मारिका’ शैलीको विकल्प दिँदै आएको छ । त्यसमा ‘इन मेमोरी अफ’ वा ‘रिमेम्बरिङ’ भनेर उल्लेख गरिएको हुन्छ । 

नयाँ रूपमा सार्वजनिक भएको पेटेन्टले एआई बजारमा बढ्दो प्रतिस्पर्धा र कम्पनीहरूको होडको संकेत गर्छ । खातालाई बन्द गरिदिनु वा जस्ताको त्यस्तै रहन दिनुको सट्टा एआईले प्रयोगकर्ताको डिजिटल संस्करणलाई निरन्तर अन्तरक्रिया गर्न अनुमति दिनेछ । यो अवधारणा जेनेरेटिभ एआई र ‘डिजिटल आफ्टरलाइफ’ भन्ने अवधारणाको मिश्रण रूप हो । 

लार्ज ल्यांग्वेज मोडेल र भ्वाइस सिन्थेसिस प्रविधिको प्रयोग गरी बनाइने यस्ता 'डेडबट' हरूलाई व्यक्तिका पूराना इमेल, म्यासेज, सामाजिक सञ्जालका पोस्ट र लेखहरूमा तालिम दिइन्छ । यसले गर्दा एआईले ती व्यक्तिकै जस्ता शब्द चयन र बोल्ने शैली  पछ्याउन सक्छ । तथापि, यी प्रविधिका कानुनी र नैतिक पक्षहरू निकै जटिल छन् ।

मृतकले आफ्नो डेटा (म्यासेज, इमेल, आवाज) एआई तालिमका लागि प्रयोग गर्न अनुमति दिएका थिए/थिएनन् भन्ने डेटा गोपनियतासम्बन्धी जटिलताबारे विज्ञहरूले औँल्याएका छन् । विभिन्न देशमा फरक स्वरूपमा रहेका डिजिटल सम्पत्ति र व्यक्तिगत अधिकारसम्बन्धी कानुनी व्यवस्थाले यस्ता प्रविधि कार्यान्वयन गर्न स्पष्ट सुरक्षा उपाय आवश्यक पर्ने विज्ञहरूको धारणा छ ।