काठमाडौँ — अमेरिकाको लस भेगासमा सुरु भएको सेस टेक्नोलोजी सम्मेलनको पहिलो दिन एनभिडियाले एआई ड्राभिङ प्रणाली सार्वजनिक गरेको हो । ‘अल्पामायोले अप्ठ्यारा र जटिल ठाउँमा पनि सुरक्षित ड्राइभिङ सुनिश्चित गर्दै गाडीलाई मानिसले जस्तै सोचेर निर्णय लिन मद्दत गर्छ,’ हुआङले भनेका छन्, ‘यसले आफ्नो ड्राइभिङ डिसिजनबारे तर्क दिन सक्छ ।’ 

हुआङका अनुसार जर्मन कार निर्माता, मर्सिडीज-बेन्जसँग मिलेर एनभिडियाले आफ्नो प्रविधिबाट चल्ने चालकरहित कार ‘मर्सिडिज-बेन्ज सीएलए’ को उत्पादन सुरु गरिसकेको छ । उक्त कार केही महिनाभित्रै अमेरिका र त्यसपछि युरोप र एसियामा सार्वजनिक गरिने उनले जानकारी दिएका छन् । ‘आज हामीले उद्घाटन गरेको अल्पामायो स्वचालित सवारीका लागि विश्वकै पहिलो थिंकिङ मोडल हो,’ हुआङले भनेका छन्, ‘यसले तपाईंको कारलाई तपाईंलेझैँ चलाउन मात्र होइन, तपाईंलेझैं सोच्ने बनाउँछ ।’ 

हुआङले एआई क्षेत्रमा अल्पामायोको प्रवेशलाई ‘फिजिकल एआईको च्याटजीपीटी’ क्षणका रूपमा व्याख्या गरेका छन् । फिजिकल एआई भनेको सफ्टवेयरमा मात्र नभएर मेसिन, रोबोट वा डिभाइससँग मिलेर काम गर्ने प्रविधि हो । च्याटबट, गुगल सर्च, नेटफ्लिक्स रेकमेन्डेसनजस्ता सफ्टवेयरमा सीमित एआईको सट्टा फिजिकल एआई भने रोबट, ड्रोन, सेल्फ ड्राइभिङ कारलगायतमा समाहित हुन्छ ।