कम्पनीले २३ जुलाई २०२३ मा एलन मस्कले सामाजिक सञ्जालमा गरेको पोस्टलाई आधार मानेको छ, जसमा मस्कले सामाजिक सञ्जालले चाँडै 'ट्विटर ब्रान्डलाई बिदाई गर्ने' उल्लेख गरेका थिए ।
What you should know
काठमाडौँ — एलन मस्कको स्वामित्वमा रहेको सामाजिक सञ्जाल एक्स (पुरानो ट्विटर) ले आफ्नो सेवा सर्त (ट्रम्स अफ सर्भिसेस) संशोधन गर्दै 'ट्विटर' नाम र त्यससँग सम्बन्धित सबै ट्रेडमार्कमा आफ्नो अधिकार कायमै रहेको स्पष्ट पारेको छ ।
अमेरिकी स्टार्टअप कम्पनीले 'ट्विटर' शब्दलाई ट्रेडमार्कका रूपमा दर्ता गराउन पहल गरेपछि एक्सले यस्तो कदम चालेको हो ।
भर्जिनियामा आधारित स्टार्टअप 'अपरेसन ब्लूबर्ड'ले एक्सले 'ट्विटर' ब्रान्ड त्यागिसकेको दाबी गर्दै अमेरिकी पेटेन्ट तथा ट्रेडमार्क कार्यालयमा डिसेम्बर २ मा निवेदन दर्ता गराएको थियो । कम्पनीले २३ जुलाई २०२३ मा एलन मस्कले सामाजिक सञ्जालमा गरेको पोस्टलाई आधार मानेको छ, जसमा मस्कले सामाजिक सञ्जालले चाँडै 'ट्विटर ब्रान्डलाई बिदाई गर्ने' उल्लेख गरेका थिए ।
तर एक्सले उक्त दाबी अस्वीकार गर्दै प्रतिवाद दायर गरेको हो । टेकक्रन्चका अनुसार उक्त बौद्धिक सम्पत्ति तथा ट्रेडमार्क कानुनसम्बन्धी फर्म 'गर्बेन आईपी' मार्फत सार्वजनिक गरिएको हो, यद्यपि समाचार प्रकाशन हुँदासम्म उक्त कागजात अमेरिकी अदालतको आधिकारिक प्रणालीमा देखिएको थिएन । प्रतिवादमा एक्सले 'ट्विटर' र 'ट्विट' ट्रेडमार्क तथा नीलो चराको लोगोमा आफ्नो एकाधिकार स्वामित्व रहेको जनाएको छ ।
उसो त अपरेसन ब्लूबर्डले निवेदन दर्ता गरेसँगै 'Twitter.new' नामको वेबसाइटमार्फत सम्भावित प्रयोगकर्ताको नाम दर्ता पनि सुरु गरेको छ। यस प्रयासको नेतृत्व इलिनोइसस्थित वकिल माइकल पेरोफ र ट्विटरका पूर्व ट्रेडमार्क वकिल स्टिफन कोट्सले गरिरहेका छन् । उनीहरूको पृष्ठभूमिलाई हेर्दा एक्ससँग प्रतिस्पर्धा गर्ने नयाँ सामाजिक सञ्जाल सुरु गर्नेभन्दा पनि 'ट्विटर' ट्रेडमार्क हात पार्ने उद्देश्य रहेको हुन सक्ने विश्लेषण गरिएको छ ।
यही जोखिमलाई ध्यानमा राख्दै एक्सले आफ्नो सेवा सर्त संशोधन गरेको हो । यसअघि सेवा सर्तमा 'एक्स' मात्र उल्लेख गरिएको थियो, 'ट्विटर' नामको कुनै सन्दर्भ थिएन । संशोधित सेवा सर्तमा युरोपेली संघका कानुन र सामग्री उत्पादनसम्बन्धी अद्यावधिक पनि समावेश गरिएको छ ।
