काठमाडौँ — अर्बपति इलन मस्कले युरोपेली संघ खारेज हुनुपर्ने बताएका छन् भने अमेरिकी राष्ट्रपति डोनाल्ड ट्रम्पले पनि युरोप आजभोल गलत दिशातर्फ लम्किरहेको प्रतिक्रिया दिएका छन् । संघअन्तर्गतको युरोपेली आयोगले एक्स (ट्विटर) लाई १४ करोड डलर जरिवाना तिर्ने निर्देशन दिएपछि मस्क र ट्रम्प दुवैले युरोपको आलोचना गरेका हुन् ।

कर कटौती र खर्च वृद्धिसम्बन्धी विधेयक ‘वान बिग ब्युटिफुल बिल’ का विषयमा मतभेद भएपछि एक-अर्कालाई सार्वजनिक रूपमै कटाक्ष गरेर अलग्गिएका ट्रम्प र मस्क युरोपको आलोचनामा एकजुट भएका हुन् । मस्कको सामाजिक सञ्जाल प्लाटफर्म एक्सले जो कोहीलाई पैसा तिरेपछि निलो चेकमार्क दिएर आम प्रयोकर्तालाई आधिकारिक खाताका विषयमा झुक्काइरहेको भन्दै युरोपेली आयोगले कम्पनीलाई जरिवाना तिर्न भनेको छ । 

युरोपेली संघका २७ वटा देशमा लागू ‘डिजिटल सर्भिस एक्ट’ अन्तर्गतका तीन फरक व्यवस्थाहरू एक्सले उल्लंघन गरेको आयोगको ठहर छ । एक्सको नीलो चेकमार्क अर्थात भेरिफाइड एकाउन्टसम्बन्धी प्रक्रियामा रहेको अस्पष्टतालाई कारण देखाउँदै आयोगले जरिवानाको निर्णय सार्वजनिक गरेको हो । नीलो चेकमार्क दिँदा झुक्याउने खालको विधि अपनाउने गरिएको र यसले प्रयोगकर्तालाई ठगी र भ्रममा पार्नसक्ने आयोगको दाबी छ ।

जरिवानासम्बन्धी आयोगले गरेको पोस्टमा कमेन्ट गर्दै मस्कले ‘वाहियात’ भनेका छन् । उनी र ट्रम्प प्रशासनका अधिकारीहरूले अमेरिकी प्रविधिलाई निरुत्साहित गर्ने नियतले युरोपले डिजिटल सेवा ऐन लागू गरेको बताउँदै आएका छन् । मस्कले लेखेका छन्, ‘युरोपेली संघ खारेज गरेर देशहरूको सार्वभौमसत्ता फिर्ता गर्नुपर्छ ताकि सरकारहरूले आफ्ना नागरिकको सही ढंगले प्रतिनिधित्व गर्न सकून् ।’