सामसङले आफ्ना ग्यालेक्सि फोनहरूमा प्रयोगकर्ताले हटाउन नमिल्ने गरी, सिस्टम एपका रूपमा 'इजरायली स्पाइवेयर एप' राखिदिएको भन्दै सामाजिक सञ्जालमा आलोचना भइरहेको छ।
What you should know
काठमाडौँ — मोबाइलमा विभिन्न एपहरू सिफारिस गर्न बनाइएको ‘एपक्लाउड’ नामक एपलाई सामसङले आफ्ना डिभाइसको अपरेटिङ सिस्टममै आबद्ध गरेको र यसले प्रयोगकर्ताका डेटा संकलन गरेर इजरायली सरकारलाई दिने गरेको आरोप लगाइएको छ ।
सामसङका फोनहरूमा यो पहिलेदेखि रहे पनि नयाँ ग्यालेक्सी डिभाइसमा यसलाई ‘डिसेबल’ गर्न वा आमप्रयोगकर्ताले सजिलै हटाउन नमिल्ने गरी राखिएको बताइन्छ । आफूलाई गैर-नाफामूलक बताउने लेबनानको डिजिटल राइटसम्बन्धी संस्था ‘एसएमईएक्स’ ले केही समयअघि सामसङलाई पठाएको खुला पत्रमा ‘इजरायली लगानी भएको अनावश्यक सफ्टवेयर जबरजस्ती राखिदिने प्रवृत्ती अन्त्यन्त गर्न’ भनिएको थियो । सो पत्र अहिले चर्चामा आएको छ ।
फोर्ब्सका अनुसार एपक्लाउड इजरायलको ‘आयनसोर्स’ नामक कम्पनीले बनाएको हो । आयनसोर्स हाल अनलाइन गेम निर्माता अमेरिकी कम्पनी युनिटीको पनि हिस्सा रहेको समाचारमा उल्लेख छ । ‘एसएमईएक्स’ ले एपक्लाउडबारे अनुसन्धान गरेको र यसलाई सामसङले डिभाइसबाट हटाउन नमिल्ने गरी र कसैले हटाउन चाहेमा फोनको वारेन्टि एवं सुरक्षा प्रबन्ध भत्किने गरी मात्रै हटाउने मिल्ने बनाएको दाबी गरेको छ ।
यो विषय सामाजिक सञ्जालमा प्रवेश गरेपछि कतिपय देशले सामसङ डिभाइसमा प्रतिबन्ध लगाउनेबारे छलफल शुरु गरेको तर एपक्लाउड विवाद पुष्टि भने नभएको अन्तर्राष्ट्रिय सञ्चार माध्यमहरूले जनाएका छन् । यस विषयमा विगत दुई वर्षदेखि आशंका फैलिरहे पनि हालै मात्र ‘इन्टरनेसनल साइबर डाइजेस्ट’ नामक एक्स युजरले पोस्ट गरेपछि झनै सनसनी मच्चिएको हो ।
पश्चिम एसियाली, उत्तर अफ्रिकी र भारत निर्यात हुने ए र एम सिरिजका फोनहरूमा सामसङले सन् २०२२ देखि नै एपक्लाउड इन्स्टल गर्दै आएको बताइन्छ । सामान्यतया इजरायलीहरूलाई व्यापार गर्न प्रतिबन्ध लगाइएका देशमा यस्ता फोन पठाउँदा त्यसले कानुनी र नैतिक प्रश्न खडा गर्ने विश्लेषण भइरहेको छ । यो विषय जटिल बन्दै गएपछि सामसङले प्रतिक्रिया दिँदै प्रयोगकर्ताको डेटा सुरक्षा र गोपनीयतालाई कम्पनीले गम्भिरतासाथ लिने र स्थानीय नियम-कानुन पालना गर्ने जनाएको छ ।
