सन् २०२२ मा जेनेरेटिभ एआईको उदयसँगै सर्च इन्जिन र ब्राउजरहरू पनि फेरिएका छन् । पहिले प्रयोगकर्ताहरूले सोधेका प्रश्नको जवाफमा लिंकहरूको सूची उपलब्ध गराउने ब्राउजरहरू अब प्रयोगकर्ताका जिज्ञासाको ‘टु द प्वइन्ट’ उत्तर दिन थालेका छन्, कतिपयले प्रयोगकर्ताका लागि एजेन्टका रूपमा कामसमेत गरिदिन्छन् । एआईको सहयताले कुन ब्राउजर कति ‘स्मार्ट’ बनाउने भन्ने होडबाजी चलेको छ । उदाहरणका लागि प्रयोगकर्ताले आफ्नो इन्टरनेट ब्राउजरलाई यात्राको लागि होटल वा उडान बुकिङ गरिदिन वा इमेल पठाउन निर्देशन दिन सक्छन् । एआईले त्यो काम गरिदिन्छ ।

परप्लेक्सिटीको ‘कमेट’ र ओपेराको ‘नियोन' जस्ता नयाँ ब्राउजरहरूले प्रयोगकर्ताका कामहरू आफैँ गर्न थालिसकेका छन् । नयाँ ब्राउजरहरूको आगमनले गुगलको सर्च र एड (विज्ञापन) व्यापारलाई भने प्रभावित पार्ने अनुमान गरिएको छ । सर्च पेजमा देखिने विज्ञापन र स्पन्सर्ड कन्टेन्ट आउन छोडेपछि गुगलको अर्बौँ डलरको विज्ञापन व्यवसाय प्रभावित हुने ठानिएको छ । तर, एआई ब्राउजरहरूको प्रतिस्पर्धामा गुगलले पनि आफूलाई तयार गरिरहेको देखिन्छ । कम्पनीले आफ्नो एआई मोडल जेमिनाइलाई क्रोममा इन्टिग्रेट गरिरहेको छ । ओपनएआईको एटलस र पर्प्लेक्सिटीको कमेटले प्राविधिक जटिलता पन्छाउन गुगलकै ‘क्रोमियम’ प्रणालीमा आफ्ना ब्राउजर निर्माण गरेकाले गुगल निश्चिन्त पनि छ ।