काठमाडौँ — पछिल्ला केही दिनयता भारतमा चिनियाँ एप, टिकटक चल्न थालेको हल्ला व्यापक फैलिएको छ । केही प्रयोगकर्ताले भीपीएनबेगर नै डेस्कटप ब्राउजरमा टिकटक खुलेको बताएका छन्प । उनीहरूले टिकटकको वेबसाइट खोलेर त्यसको स्क्रिनसट सामाजिक सञ्जालमा पोस्ट गरेका छन् । तर, भारत सरकारले टिकटकमाथिको प्रतिबन्ध हटेको कुरा पूर्ण रूपमा असत्य र भ्रामक भएको भन्दै खण्डन गरिसकेको छ ।

शुक्रबारदेखि टिकटकको ‘अबाउट’ पेज देखिन थालेपछि प्रयोगकर्ताले यसलाई भारतमा टिकटक चल्ने संकेतका रूपमा लिएका थिए । प्रयोगकर्ताहरूले सो पेजका स्क्रिनसट सामाजिक सञ्जालमा साझा गरेपछि हल्ला झन् फैलिएको हो । तर, वेबसाइटभित्र लग इन गर्न वा भिडियो अपलोड गर्न भने मिलेको थिएन । भारतमा गुगल प्लेस्टोर र एप्पलको एपस्टोरमा पनि टिकटक उपलब्ध छैन ।

त्यहाँको सूचना प्रविधि मन्त्रालयले विज्ञप्ति जारी गर्दै टिकटक ‘अनब्लक’ (प्रतिबन्ध हटाउने) कुनै पनि आदेश जारी नभएको स्पष्ट पारेको छ । मन्त्रालयका अनुसार आंशिक रूपमा देखिएको टिकटक पेज प्राविधिक त्रुटि मात्रै हो । तथापी, एनडीटीभीका अनुसार हाल कतिपय प्रयोगकर्ताले चिनियाँ अनलाइन सपिङ साइट, अलिएक्स्प्रेस पनि खोल्न सकिरहेका छन् ।