काठमाडौँ — विश्वका ठूाला प्रविधि कम्पनीहरूबीच आर्टिफिसियल इन्टेलिजेन्स (एआई) प्रविधि विकासमा प्रतिस्पर्धा र लगानी बढ्दो छ । यो माहोललाई थप तताउँदै फेसबुकको प्यारेन्ट कम्पनी, मेटाले हालै मात्र स्केल एआईमा १४.३ अर्ब अमेरिकी डलर लगानी गर्ने घोषणा गरेको छ ।

डेटा क्युरेसन एवं डेटासेट व्यवस्थापनसम्बन्धी सेवा प्रदान गर्ने कम्पनीको ४९ प्रतिशत स्वामित्व खरिद गर्ने कम्पनीको निर्णयसँगै कम्पनीका २८ वर्षिय संस्थापक अलेक्जेन्डर वाङको चर्चा चुलिएको छ ।

वाङ अब मेटाको नयाँ ‘सुपरइन्टेलिजेन्स’ इकाइका प्रमुख हुने तय भएको छ । यो घोषणाले स्केल एआईका प्रतिस्पर्धी कम्पनीको माग ह्वात्तै बढाइदिएको छ भने गुगल, ओपनएआई लगायतले स्केलसँग सम्बन्ध तोड्ने भएका छन् । स्केल एआईमा उल्लेख्य लगानी गरेसँगै मेटाले उक्त कम्पनीका प्रमुख कार्यकारी अधिकृत वाङलाई आफ्नो नयाँ ‘सुपरइन्टेलिजेन्स’ अनुसन्धान प्रयोगशालाको नेतृत्व गर्न नियुक्त गरेको हो । 

वाङ यस्ता व्यक्ति हुन् जसले न्युरालिंकको ब्रेन-कम्प्युटर इन्टरफेस तयार नहुन्जेल सन्तान नजन्माउने प्रतिक्रिया दिँदै आएका छन् । आगामी पुस्तामा सुपरइन्टेलिजेन्स समाहित गर्ने उनको उदेश्य यसबाट बुझ्न सकिन्छ । अर्बपति इलन मस्कको कम्पनी न्युरालिंकले मानिसको मस्तिष्कमा राख्नलाई सिक्का आकारको माइक्रोचिप्स विकास गरिरहेको छ । कम्पनीले हाल तीनजना व्यक्तीको मस्तिष्कमा यस्तो चिप जडान गरिसकेको छ ।