नेपाली विद्यार्थीले बनाएको रकेटको परीक्षण सफल- विज्ञान र प्रविधि - कान्तिपुर समाचार

नेपाली विद्यार्थीले बनाएको रकेटको परीक्षण सफल

'क्वान्टम' नामक रकेट २.१ किलोमिटर उचाइमा पुग्यो
५ औं पटकको प्रयास सफल
गोविन्द पोखरेल

काठमाडौँ — नेपाली विद्यार्थीहरुले बनाएको 'क्‍वान्टम' रकेटको परीक्षण सफल भएको छ । राष्ट्रिय आविष्कार केन्द्रमार्फत् इन्जिनियरिङका विद्यार्थीहरुले बनाएको रकेटकाे 'सुपर सोनिक' टेस्ट सफल भएको हो । 

थानकोटस्थित नेपाली सेनाको फायरिङ रेन्जमा रकेट परीक्षण गरिएकाे हाे । 'हाम्रो रकेटको सुपर सोनिक टेस्ट सफल भयो । म्याक-२ स्पिड हो यो,' मुख्य निर्माणकर्ता मोहन तामाङले कान्तिपुरसित भने, '५ औं पटकको प्रयास सफल भयो ।'

सुपर सोनिक यो रकेट प्रक्षेपणको क्रममा ८७८ मिटर प्रतिसेकेन्डको गतिमा उडेको थियो । हावामा ध्वनिको गति ३ सय ४३ मिटर प्रतिसकेन्ड हुन्छ । ६.१ फिट उचाइ रहेको रकेटको तौल ९ किलो छ । रकेटमा पोटासियम नाइट्रेट र टेबल सुगर सोलिड इन्धनको रुपमा प्रयोग गरिएको छ । यसमा १.२ केजी फ्यूल प्रयोग हुन्‍छ ।

क्‍वान्टमको प्रक्षेपणका क्रममा अधिकतम १८ सय न्यूटन इनर्जी दिएको थियो । उडानका लागि न्यूनतम ९ सय न्‍यूटन थ्रस्ट आवश्‍यक पर्ने तामाङले बताए ।

प्रक्षेपणका क्रममा रकेट २.१ किलोमिटर माथि पुगेको थियो । उचाइमा पुगेको रकेट प्यारास्युटको मद्दतमा झारिएको थियो । 'प्यारासुट रिकभरीका लागि हो । फ्युलमात्रै परिवर्तन गरेर रकेटलाई फेरि उडाउन सकिन्छ भन्ने उद्देश्य हो,' तामाङले भने । फाइबर ग्लास प्रयोग गरेर निर्माण गरिएको रकेट कम खर्चमा तयार गरिएको हो ।

यसमा विभिन्न सेन्सरको प्रयोग गरिएको छ । रकेटका विभिन्न 'एस्पेक्ट' पत्ता लगाउन सेन्सर प्रयोग गरिएको तामाङले बताए । उनका अनुसार नेपाललाई अन्तरिक्ष क्षेत्रमा पुर्‍याउने उद्देश्यले रकेट बनाइएको हो ।

रकेट निर्माणमा तामाङबाहेक इन्जिनियरिङ अध्ययन पूरा गरेका रामहरि चौधरी, शिवनारायण कुँवर, प्रदिप्‍त शर्मा, ईश्वर श्रेष्ठ, दानबहादुर घर्तीमगर र दीपेन्द्र बस्नेत छन् । निर्माणकर्ताहरु उज्जवल ढकाल, रमेश साउद र अमृत ढुंगाना भने इन्जिनियरिङ अध्ययन गरिरहेका छन् । उनीहरु काठमाडौं विश्वविद्यालय, थापाथली इन्जिनियरिङ क्‍याम्प‌स, काठमाडौं इन्जिनियरिङ कलेज, अक्सफोर्ड इन्जिनियरिङ कलेज र कलेज अफ इन्फरमेसन टेक्नोलोजी एन्ड इन्जिनियरिङमा पनि आबद्ध छन् ।

रकेटलाई थप विकासित गर्दै लैजाने योजना आफूहरुको रहेको तामाङ बताउँछन् । यसअघि नेपाली विद्यार्थीहरुले बनाएकाे गरुडा रकेट भने परीक्षण असफल भएकाे थियो । अमेरिकामा हुने प्रतिस्पर्धा लक्षित गरेर बनाइएकाे रकेटकाे विकास कोरोना भाइरसका कारण रोकिएको थियो ।

प्रकाशित : श्रावण १४, २०७८ २०:१३
प्रतिक्रिया
पठाउनुहोस्

एनआरएनए बहराइनको अध्यक्षमा गिरी 

कान्तिपुर संवाददाता

काठमाडौँ — गैरआवासीय नेपाली संघ (एनआरएनए), बहराइनको अध्यक्षमा लक्ष्मी गिरी दोस्रो कार्यकालका लागि निर्वाचित भएकी छन् । उनले प्रतिद्वन्द्वी सुभाष केसीलाई पराजित गरेकी हुन् । 

राजधानी मनामामा भएको एनआरएनको आठौं महाधिवेशनमा गिरीले ९ सय ५६ मत र केसीले ३ सय ९ मत पाए । अन्तर्राष्ट्रिय समन्वय समितिमा बहराइनको तर्फबाट दिनेशबहादुर बस्नेतले प्रतिनिधित्व गरेका छन् ।

निर्वाचन संयोजक राजकुमार बस्नेतका अनुसार महाधिवेशनले वरिष्ठ उपाध्यक्ष अमर श्रेष्ठ, उपाध्यक्षद्वय तीर्थबहादुर भण्डारी र युवराज प्याकुरेल, महिला उपाध्यक्ष कृष्णकुमारी गुरुङ, महासचिव राजुकुमार श्रेष्ठ, सचिव वीरेन्द्र बुढाथोकी, कोषाध्यक्ष भावना आचार्य पन्त, सहसचिव कृष्णप्रसाद गैरे, महिला संयोजक संगीता खत्री, सहकोषाध्यक्ष दिपबिक्रम राना, युवा संयोजक सन्तकुमार न्यौपानेलाई चयन गरेको हो ।

सदस्यहरुमा तिलकबहादुर कार्की, दिपकबहादुर दर्जी, सुशीला खत्री, रुद्रमणि उप्रेती, मिना तामाङ, फलामसिंह लामा र सूर्य भण्डारी चयन भएका छन् ।

प्रकाशित : श्रावण १४, २०७८ १९:३७
पूरा पढ्नुहोस्
प्रतिक्रिया
पठाउनुहोस्
×