कञ्चनपुर — पहाडी क्षेत्रमा वर्षा नरोकिँदा महाकाली नदीको जलस्तर निरन्तर बढिरहेको छ । सोमबार रातिदेखि नै महाकालीको वहाव बढेको हो । जलस्तर बढेपछि शारदा ब्यारेजको पुलमा मंगलबार बिहानदेखि राेक लगाइएको चार पांग्रे सवारी साधनको अवागमन अझै सुचारु हुन सकेको छैन ।

जिल्ला प्रहरी कार्यालय कञ्चनपुरका डिएसपी टेकबहादुर रावतका अनुसार मंगलबार दिउँसो १ः३० बजेको मापन अनुसार महाकालीको जलस्तर १ लाख २४ हजार ४५४ क्युसेक पुगेको छ । मंगलबार बिहानदेखि १ लाख क्युसेक नाघेको थियो ।

दार्चुला, बैतडी, डडेलधुरालगायतका पहाडी जिल्लामा लगातारको वर्षाले महाकालीको जलस्तर बढेको हो । महाकालीमा जलस्तर बढेसँगै मंगलबार बिहानैदेखि शारदा ब्यारेजको पुलमा चार पांग्रे सवारी साधन अवागमनमा रोक लगाइएको हो । ठूला सवारी साधन अवागमन बन्द भएपछि यात्रु पैदलै आउजाउ गरिरहेका छन् ।