कञ्चनपुर — च्याउ टिप्न शुक्लाफाँटा राष्ट्रिय निकुञ्जको जंगलमा पसेर सम्पर्कविहीन भएकाहरुको खोजीका लागि सुरक्षाकर्मीदेखि निकुञ्जका कर्मचारी र हात्तीसँगै ड्रोनको समेत प्रयोग भइरहेको छ । 

आइतबार  साँझदेखि नै खोजी कार्य सुरु भए पनि अहिलेसम्म उनीहरु सम्पर्कमा आएका छैनन् । ‘खोजीका लागि नेपाली सेनादेखि प्रहरी र निकुञ्जका कर्मचारीदेखि सबै हात्ती पनि परिचालन गरेका छौं,’ शुक्लाफाँटा राष्ट्रिय निकुञ्जका संरक्षण अधिकृत पुरुषोत्तम वाग्लेले भने, ‘अहिले ड्रोनको प्रयोग पनि भइरहेको छ ।’ उनका अनुसार नेपाली सेना, प्रहरी, सशस्त्र प्रहरी, नगर प्रहरी, निकुञजका सबै पोष्टका कर्मचारी र स्थानीय जुटेका छन् । 

उनका अनुसार वर्षा भएपछि निकुञ्ज छेउका स्थानीय ठूलो संख्यामा जंगल पस्ने गर्छन् । वर्षाकै कारण उनीहरु हिँडडुल गरेको कुनै पदचाप पनि देखिएको छैन । यसले खोजीमा समस्या भएको छ । ‘अहिले घाँस पनि ठूलो छ, वर्षाले जताततै जान सकिने अवस्था छैन,’ वाग्लेले भने, ‘समूहमा भएका कराण उनीहरु सुरक्षित नै होलान् भन्ने आशा छ, निकुञ्जभित्रै मचानमा बसेका हुन सक्ने अनुमान गरेका छौं, हामी सबै मचानहरुमा हेरिरहेका छौं, अब ड्रोन उडाएर पनि खोजी गरिरहेका छौं ।’ उनले निकुञ्जमा रहेका ९ वटै हात्ती समेत परिचालन गरिएको बताए । निकुञ्जभित्र अहिले ९ वटा पालुवा हात्ती रहेका छन् ।