कञ्चनपुर — शुक्लाफाँटा राष्ट्रिय निकुञ्जको जंगलमा च्याउ टिप्न गएर सम्पर्कविहीन भएका सबै १७ जनाको सकुशल उद्धार गरिएको छ ।

आइतबार बिहान च्याउ टिप्न गएका भीमदत्त नगरपालिका १९ बागफाँटा र वेदकोट नगरपालिका १० चतहरीका गरी १४ जना तथा बेलडाँडी गाउँपालिका २ चौवन्नीका ३ जना गरी १७ जना महिला जंगलभित्र बाटो बिराएर सम्पर्कविहीन भएका थिए । खोजीका लागि निकुञ्जमा रहेका ९ वटै पालुवा हात्ती परिचालन गरिएको थियो भने ड्रोनमार्फत निगरानी समेत गरिएको थियो ।

यसअघि सोमबार मध्यान्ह बेलडाँडी गाउँपालिका २ चवन्नीका मञ्जु रानाक्षेत्री, लक्ष्मी थापामगर र सीता चौधरीलाई सकुशल उद्धार गरिएको थियो । त्यसपछि दिउँसोतिर भीमदत्त नगरपालिका १९ बागफाँटा र वेदकोट नगरपालिका १० चतहरीका १४ जनालाई पनि उद्धार टोलीले फेला पारी सुरक्षित रूपमा परिवारको जिल्ला लगाइएको सशस्त्र प्रहरी बल नेपाल नं. ३५ गण शैलेश्वरीका गणपति सशस्त्र प्रहरी उपरीक्षक प्रेमप्रकाश सिग्देलले जानकारी दिए । 'सबै जना सुरक्षित अवस्थामा फेला परेका छन् । आवश्यक समन्वय र खोजीपछि उनीहरूलाई जंगलबाट बाहिर ल्याएर घर पठाइएको छ,' उनले भने। हराइरहेकाहरूको खोजीका लागि प्रमुख जिल्ला अधिकारी मदन कोइरालाको समन्वयमा नेपाल प्रहरी, सशस्त्र प्रहरी, नेपाली सेना, शुक्लाफाँटा राष्ट्रिय निकुञ्ज प्रशासन तथा स्थानीयवासी परिचालित भएका थिए ।

उद्धार गरिएकी मञ्जु रानाक्षेत्रीले जंगलभित्र बाटो बिराएपछि रातभर रुखमै बसेर रात काट्नुपरेको बताइन् । 'च्याउ खोज्दै जाँदा थाहा नै नपाई धेरै भित्र पुग्यौँ । फर्किने बाटो भेटिएन । साँझ परेपछि हिँड्दा झन् जोखिम हुने देखेर सिमलको रुखमा चढेर रात बितायौँ । बिहान मोबाइलमा सिग्नल आएपछि घरमा फोन गर्न सफल भयौँ । त्यसपछि उद्धार टोली आएर हामीलाई सुरक्षित बाहिर निकाल्यो,' उनले भनिन् ।

उद्धार गरिएकी लक्ष्मी थापामगरले रातभर जंगली जनावरको त्रासमै बस्नुपरेको सुनाइन् । 'चारैतिर जनावरको आवाज सुनिन्थ्यो । धेरै डर लागेको थियो । हामी एकअर्कालाई हौसला दिँदै बिहानसम्म बस्यौँ । उद्धार टोली देखेपछि बल्ल ज्यान बाँच्ने आशा पलायो,' उनले भनिन् ।

भीमदत्त नगरपालिका १९ बागफाँटाकी सबिता चौधरीले पनि जंगलभित्र बाटो छुटेपछि सबै जना एकै ठाउँमा बसेर उद्धारको प्रतीक्षा गरेको बताइन् । 'हामीले भोकभोकै रात बितायौँ । उज्यालो भएपछि फेरि घर खोज्न हिड्यौँ । घर नजिक पुग्दा उद्धार टोली भेटिएपछि ढुक्क भयौँ,' उनले भनिन् ।