आइतबार बिहान शारदा ब्यारेज (महाकाली नदी)मा पानीको बहाव ३५ हजार क्युसेक आसपास रहेकोमा अपराह्नको मापनअनुसार बढेर ६० हजार क्युसेक नजिक पुगेको कञ्चनपुरका प्रमुख जिल्ला अधिकारी मदन कोइरालाले जानकारी दिएका छन् ।
What you should know
कञ्चनपुर — पहाडी क्षेत्रमा निरन्तर भइरहेको वर्षासँगै कञ्चनपुरस्थित महाकाली नदीमा पानीको बहाव बढ्दो क्रममा छ । आइतबार बिहान शारदा ब्यारेज (महाकाली नदी)मा पानीको बहाव ३५ हजार क्युसेक आसपास रहेकोमा अपराह्नको मापनअनुसार बढेर ६० हजार क्युसेक नजिक पुगेको कञ्चनपुरका प्रमुख जिल्ला अधिकारी मदन कोइरालाले जानकारी दिएका छन् । उनका अनुसार पहाडी क्षेत्रमा लगातार वर्षा भइरहेकाले नदीको बहाव अझै बढ्न सक्ने सम्भावना छ । त्यसैले महाकाली नदी आसपासका तटीय क्षेत्रका बासिन्दालाई आवश्यक सतर्कता अपनाउन, नदी किनारमा अनावश्यक आवतजावत नगर्न तथा स्थानीय प्रशासन र सुरक्षा निकायबाट जारी गरिएका सूचनाको पालना गर्न आग्रह गरिएको छ ।
प्रशासनले नदी किनारमा माछा मार्ने, नदी तर्ने तथा जोखिमयुक्त गतिविधि नगर्न, आवश्यक परे सुरक्षित स्थानतर्फ सर्न र कुनै पनि आपत्कालीन अवस्था आएमा तत्काल स्थानीय प्रशासन वा सुरक्षा निकायलाई जानकारी गराउन सर्वसाधारणसँग अपिल गरेको छ ।
त्यस्तै, महाकालीसँगै तटीय बस्ती, होचा भूभाग तथा बाढीको जोखिम रहेका क्षेत्रमा निगरानी बढाइएको कञ्चनपुर प्रशासनले जनाएको छ । स्थानीय तह, सुरक्षा निकाय र विपद् व्यवस्थापनसँग सम्बन्धित संयन्त्रलाई आवश्यक तयारी अवस्थामा राखिएको प्रमुख जिल्ला अधिकारी कोइरालाले जानकारी दिए ।
जल तथा मौसम विज्ञान विभागले साउन ३ देखि ५ गतेसम्म सुदूरपश्चिम प्रदेशका अधिकांश स्थानमा मध्यमदेखि भारी वर्षा हुने पूर्वानुमान गरेको छ । विभागका अनुसार निरन्तर वर्षाका कारण साना नदी, खोला तथा नालाहरूमा जलसतह अचानक बढ्न सक्ने, डुबान तथा कटानको जोखिम रहने भएकाले उच्च सतर्कता अपनाउन अनुरोध गरिएको छ ।
