धनगढी — सुदूरपश्चिम प्रदेश सरकारले आगामी आर्थिक वर्षका लागि प्रदेशसभामा प्रस्तुत गरेको बजेट तथा सम्बन्धित विधेयकहरु तीन सातापछि बल्ल प्रदेश सभासमक्ष टेबल गरिएको छ । 

मंगलबार बसेको प्रदेश सभा बैठकमा आर्थिक मामिलामन्त्री विक्रमसिंह धामीले विधेयकहरु टेबुल गरेका हुन् । मन्त्री धामीले राजस्व र व्ययको वार्षिक अनुमान (बजेट), अर्थसम्बन्धी प्रस्तावलाई कार्यान्वयन गर्न बनेको आर्थिक विधेयक तथा सेवा र कार्यको लागि प्रदेश सञ्चित कोषबाट रकम विनियोजन र खर्च गर्ने सम्बन्धमा व्यवस्था गर्न बनेको विधेयकलाई टेबल गरेका छन् । 

बजेट वक्तब्य लगत्तै सत्ता साझेदार दल एमालेले बजेट अस्वीकार गर्ने निर्णय गरेपछि अन्योल बढेको थियो । एमालेले संशोधन प्रस्ताव दर्ता गर्ने संसदीय दलबाटै निर्णय गरिसकेको छ । अर्कोतिर सरकारको नेतृत्व गरिरहेको कांग्रेसकै सांसदहरुसमेत बजेटको विरोधमा उत्रिएपछि मुख्यमन्त्री शाह अप्ठेरोमा परेका थिए । सुदूरपश्चिममा कांग्रेस नेतृत्वमा एमालेको साझेदारीमा प्रदेश सरकार छ ।   

बजेट सम्बन्धी विधेयकहरु सभामा टेबुल भए पनि एमाले सांसदहरुले भने आफ्नो अडानबाट पछि नहटेको बताएका छन् । ‘बजेटमा संशोधन हाल्ने हाम्रो दलको निर्णय यथावत छ,’ एमाले संसदीय दलका उपनेता सन्तोषकुमारी शर्मा थापाले भनिन् ‘बजेटप्रति चौतर्फी असन्तुष्टि छ ।’ मुख्यमन्त्री कमलबहादुर शाहले बजेटमा केही कमीकमजोरी रहेको स्वीकार्दै सत्ता साझेदार दलहरु बीच छलफल चलिरहेकोले बजेटमा भएका त्रुटिहरु सच्च्याएर समयमै पारित हुनेमा आफू विश्वस्त रहेको बताएका छन् । आगामी आर्थिक वर्षको बजेट असारभित्र बजेट पारित भइसक्नु पर्ने हुन्छ । 

एमाले संसदीय दलले बजेटमा कांग्रेसले एकलौटी गरेको आरोप लगाउँदै विमति जनाएर संशोधनको माग अघि सारेको हो । मन्त्रिपरिषद्मा भौतिक पूर्वाधार, भूमि ब्यवस्था कृषि तथा सहकारी र आन्तरिक मामिला तथा कानुन मन्त्रालयको नेतृत्व गरेको छ भने कांग्रेसले मुख्यमन्त्रीसहति आर्थिक मामिला, सामाजिक विकास र उद्योग पर्यटन वन तथा वातावरण मन्क्रालयको नेतृत्व गरेको छ ।