धनगढी — सुदूरपश्चिमका मुख्यमन्त्री कमलबहादुर शाहविरुद्ध कांग्रेस संसदीय दलमा अविश्वासको प्रस्ताव दर्ता भएको छ । प्रदेश सभामा कांग्रेस संसदीय दलमा सभापति गगन थापा समर्थन सांसदहरूले दल नेता रहेका मुख्यमन्त्री कमलबहादुर शाहविरुद्ध अविश्वासको प्रस्ताव दर्ता गरेका छन् । शाह कांग्रेसका पूर्वसभापति शेरबहादुर देउवा निकट हुन् ।

१८ जना सांसद रहेको संसदीय दलका ९ जनाले प्रस्तावमा हस्ताक्षर गरेका छन् । हस्ताक्षर गर्नेमा सचेतक गीता चौधरी, सांसदहरू मानबहादुर रावल, दिवानसिंह विष्ट, पदमबहादुर शाही, डम्मरी महरा, तुलसी देवकोटा, बेलबहादुर राना मगर, ललिता सुनार र जुनाकुमारी दानी रहेका छन् ।  

कांग्रेसका सांसदहरूले मुख्यमन्त्री शाहलाई राजीनामा दिन माग गर्दै आएका थिए । उनीहरूले राजीनामा नदिए दल नेताबाट हटाइदिने धम्की दिँदै आएका थिए ।

शाहविरुद्ध अविश्वासको प्रस्ताव दर्ता गरिएको कांग्रेस सांसद दिवानसिंह विष्टले पुष्टि गरे । विष्टले कांग्रेसका कूल सांसद संख्या १८ जना रहेकामा सांसद प्रकाशबहादुर देउवा महिनौंअघिदेखि अमेरिका भएकाले ९ जना बहुमत हुने जिकिर गरे । विष्टले सरकारको नेतृत्व परिवर्तन गर्ने उद्देश्यले संसदीय दलको नेतामा अविश्वासको प्रस्ताव दर्ता गरिएको बताए । यता, संसदीय दलका प्रमुख सचेतक विक्रमसिंह धामीले भने प्रस्ताव दर्ताबारे आफूलाई जानकारी नभएको बताएका छन् ।