बैतडी — भूमि समस्या समाधान आयोग जिल्ला समिति बैतडीले पञ्चेश्वर गाउँपालिकाका २० जना सुकुमवासीलाई लालपुर्जा वितरण दिने तयारी गरेको छ ।

गाउँपालिकाले प्रमाणीकरण गरेका ५९ जना सुकुमवासीमध्ये पहिलो चरणमा २० जनालाई लालपुर्जा वितरण गर्ने तयारी गरिसकेको भूमि समस्या समाधान आयोग जिल्ला समिति बैतडीका अध्यक्ष रमेश पाण्डेयले जानकारी दिए । 

‘सातदिने सूचनामा कसैले पनि हकदाबी नगरेपछि भूमिहीन सुकुमवासी भनिएकाहरुको तिनपुस्ते विवरण मालपोत कार्यालयमा बुझाइने छ,’ उनले भने, ‘तीन पुस्ते बुझाइएकाहरुको नाममा कुनै ठाउामा जग्गा/जमीन नभएको एकीन गरेर मात्र वितरण गरिने छ ।’ 

भूमिहीन सुकुमवासीहरुलाई जग्गा उपलब्ध गराउनका लागि जग्गाको हकदाबी पेश गर्न सात दिने सूचना प्रकाशित गरिसकेको छ । गाउँपालिका संगको समन्वयमा प्रमाणीकरण गरिएका भूमिहीन दलित र भूमिहीन सुकुमवासीका लागि नापजाँच गरिएको जग्गा उपलब्ध गराउने तयारी अन्तिम चरणमा पुगीसकेको अध्यक्ष पाण्डेयले बताए ।