डोटी — डोटीको बाल सुधारगृहमा क्षमताभन्दा बढी बालबिज्याइँकर्ता भएपछि बालबालिकाको दैनिकी चुनौतीपूर्ण बनेको छ ।२५ जना क्षमता रहेको सुधारगृहमा हाल ३४ बालबिज्याइँकर्ता छन् ।

सीमित संरचना र स्रोतबीच व्यवस्थापन गर्नुपर्ने यो अवस्थाले सुधारगृहको दैनिकी चुनौतीपूर्ण बनिरहेको हो ।

सुदूरपश्चिमका पहाडी जिल्लाबाट आएका बालबिज्याइँकर्ताहरू यहाँ एकै छानामुनि अनुशासन र सुधारको अभ्यासमा छन् । उपलब्ध तथ्यांकअनुसार बैतडी र अछामबाट सबैभन्दा धेरै ८/८ जना रहेका छन् । बझाङका ५, दार्चुलाका ४, डोटीका ४, डडेलधुराका ३ र बाजुराका २ जना बालबिज्याइँकर्ता सुधारगृहमा छन् । फरक–फरक भौगोलिक र सामाजिक पृष्ठभूमिबाट आएका यी सबै अहिले नयाँ जीवनतर्फ उन्मुख हुन प्रयासरत छन् ।

कैलाली र कञ्चनपुरबाट आएकालाई भने डोटीमा नराखी बर्दियास्थित सुधारगृहमा पठाउने गरिएको बाल सुधारगृहकी प्रमुख सानुमाया गुरुङले बताइन् । व्यवस्थापन र पहुँचको दृष्टिले यस्तो व्यवस्था मिलाइएको उनको भनाइ छ ।