डडेल्धुरा —  

आगामी वैशाख २ गतेदेखि देशैभर आर्थिक गणना सुरु हुने भएको छ । आर्थिक गणनाअन्तर्गत डडेल्धुरामा १७ जना गणक र तीन जना सुपरिवेक्षक खटिने व्यवस्था मिलाइएको हो । 

बुधबार जिल्ला सदरमुकाममा आयोजित ‘अर्थतन्त्रको मापनका लागि आर्थिक गणना’सम्बन्धी जिल्लास्तरीय सचेतना गोष्ठीमार्फत जिल्ला आर्थिक गणना कार्यालय डडेल्धुराले उक्त जानकारी गराएको हो । 

जिल्ला आर्थिक गणना अधिकारी कर्णबहादुर क्षेत्रीले देशभरकै कार्यक्रमअनुसार डडेल्धुरामा पनि वैशाख २ देखि असार ७ गतेसम्म आर्थिक गणना सञ्चालन गरिने बताए । उनका अनुसार जिल्लाभर सञ्चालनमा रहेका उद्योग, व्यापारिक प्रतिष्ठान, सामान्य पान पसल, चियापसल, होटलदेखि लिएर साना–ठूला सबै प्रकारका आर्थिक क्रियाकलापको गणना गरिनेछ । 

‘जिल्लामा जहाँ जहाँ आर्थिक गतिविधि सञ्चालन भइरहेका छन्, ती सबै क्षेत्र यस गणनामा समेटिनेछन्,’ क्षेत्रीले भने, ‘वस्तु उत्पादन गर्ने र सेवा प्रदान गर्ने सबै प्रकारका क्रियाकलापहरूको तथ्यांक संकलन गरिनेछ, जसले राज्यलाई नीति निर्माण तथा योजना तर्जुमामा महत्त्वपूर्ण सहयोग पुर्‍याउनेछ ।’