डोटी — डोटीमा बढ्दो लागुऔषध प्रयोग र कारोबार नियन्त्रणका लागि तीन महिने विशेष अभियान सञ्चालन गरिने भएको छ ।

जिल्ला प्रशासन कार्यालय डोटीको आयोजनामा सोमबार सरोकारवाला निकायहरूसँग बसेको समन्वय बैठकले यस्तो निर्णय गरेको हो । प्रमुख जिल्ला अधिकारी कल्पना घिमिरे नेपालको अध्यक्षतामा बसेको बैठकले चैतदेखि जेठसम्म तीन चरणमा अभियान सञ्चालन गर्ने निर्णय गरेको छ ।

उनका अनुसार पहिलो चरणमा समुदायस्तरमा सचेतना अभिवृद्धिमा जोड दिइनेछ । यसअन्तर्गत समुदायमा अन्तरक्रिया, विद्यालयमा लागुऔषध रोकथामसम्बन्धी कक्षा, हस्ताक्षर अभियान तथा सहायता कक्ष स्थापना गरिने कार्यक्रम तय गरिएको छ ।

दोस्रो चरणमा लागुऔषध सम्बन्धी कसुरमा कानुनी कारवाहीलाई कडाइ गरिनेछ भने तेस्रो चरणमा दुर्व्यसनीहरूको पुनःस्थापना र सामुदायिक सहयोगमा विशेष ध्यान दिइनेछ ।

बैठकले जिल्लाका संवेदनशील क्षेत्रहरूलाई उच्च निगरानीमा राख्दै अवैध मदिरा तथा लागुऔषधको बिक्री–वितरण र सेवन नियन्त्रणका लागि सुरक्षा संयन्त्रलाई थप सक्रिय बनाउने निर्णय पनि गरेको छ । नियमित अनुगमन, निरीक्षण तथा जाँचलाई समेत कडाइ गरिने जनाइएको छ ।