विद्यालय परिसरमा आयोजित कार्यक्रममा विद्यार्थीहरूले विभिन्न विज्ञानसम्बन्धी परियोजना र प्रयोगात्मक सामग्री प्रदर्शन गरेका थिए । कार्यक्रमअन्तर्गत विद्यार्थीहरूले तयार पारेका विभिन्न परिकारसहित फुड फेस्टिवल पनि आयोजना गरिएको थियो । फुड फेस्टिवलमा विद्यार्थीले स्थानीय तथा आधुनिक परिकार तयार पारेका थिए । 

विद्यालयले आयोजना गरेको विज्ञान प्रदर्शनी तथा फुड फेस्टिवल प्रभावकारी भएको अभिभावक गोविन्द खडायतले बताए । यस्ता कार्यक्रमले विद्यार्थीको प्रतिभा उजागर गर्न तथा व्यावहारिक ज्ञान बढाउन मद्दत पुग्ने उनको भनाइ थियो । विज्ञान प्रदर्शनीमा सहभागी विद्यार्थी यथार्थ पन्तले विद्यालयमा यस्ता कार्यक्रम आयोजना हुँदा आफ्नो ज्ञान र सीपमा अभिवृद्धि हुने बताउँदै पढाइसँगै व्यावहारिक अनुभव प्राप्त हुने बताए । 

विद्यालयका प्रधानाध्यापक महेश महराले विद्यालयले विद्यार्थीलाई अनुशासन मात्र नभई दैनिक जीवनमा काम लाग्ने व्यावहारिक तथा वैज्ञानिक ज्ञान पनि सिकाइरहेको बताए । यस्ता कार्यक्रममार्फत विद्यार्थीको सिर्जनशीलता र व्यावहारिक सीप विकासमा टेवा पुग्ने उनको भनाइ थियो ।