डडेल्धुरा — स्थायी डम्पिङ साइट निर्माणमा लामो समयदेखि झुक्याएको भन्दै अमरगढी नगरपालिका–६ का स्थानीय बिरोधमा उत्रिएका छन्।

फोहरविरुद्ध संघर्ष समिति गठन गरेका उनीहरुले बिहीबार वडा कार्यालयमा प्रदर्शन गरेका हुन् ।

नगरपालिकाले स्थायी डम्पिङ साइट नहुँदा वर्षौंदेखि सदरमुकाम नजिकैका विभिन्न अस्थायी स्थानमा फोहर थुपार्दै आएको छ। यसअघि अमरगढी–७ को कुइयाधार क्षेत्रमा फोहर फालिँदै आएकोमा स्थानीयको विरोधपछि त्यहाँबाट हटाइएको थियो।

त्यसपछि सदरमुकामबाट करिब दुई किलोमिटर टाढा मालम गाउँ जाने सडक छेउमा फोहर थुपार्न थालिएको छ, जहाँ हाल कुहिने र नकुहिने सबै प्रकारका फोहर एकै ठाउँमा जलाइँदै आएको छ। यसले धुँवा, दुर्गन्ध र प्रदूषण बढाएको स्थानीयको पनि गुनासो छ।

फोहर व्यवस्थापनको दीर्घकालीन समाधानका लागि नगरपालिकाले अमरगढी–६ अन्तर्गत गुनेगाड क्षेत्रमा १४ रोपनी जग्गा स्थानीयबाट खरिद गरिसकेको छ। उक्त जग्गा सरकारी दररेटमै खरिद गरिएको र वातावरणीय प्रभाव मूल्यांकन समेत सम्पन्न भइसकेको छ। तर, मूल्यांकन प्रतिवेदन अन्तिम रूपमा नआएकाले निर्माण प्रक्रिया अघि बढ्न सकेको छैन। यही स्थानमा फोहर व्यवस्थापन केन्द्र  निर्माण गर्ने तयारी भएपछि स्थानीय असन्तुष्ट बनेका हुन्।