विद्युत् नपुगेका केन्द्रहरूमा विद्युत् आपूर्ति गर्न नसकिए निर्वाचन व्यवस्थापन, मतगणना तथा सुरक्षा तथा सञ्चारसम्बन्धी काममा समस्या उत्पन्न हुन सक्ने भएकाले समयमै आवश्यक पहल गर्न आग्रह गरिएको हो ।
डडेल्धुरा — प्रतिनिधि सभा सदस्य निर्वाचनलाई लक्षित गर्दै डडेल्धुरा जिल्लाका विभिन्न मतदान केन्द्रमा विद्युत् आपूर्ति सुनिश्चित गर्न जिल्ला प्रशासन कार्यालय डडेल्धुराले नेपाल विद्युत् प्राधिकरणलाई आग्रह गरेको छ ।
जिल्ला प्रशासन कार्यालय डडेल्धुराले आगामी फागुन २१ मा हुने प्रतिनिधिसभा सदस्य निर्वाचनका क्रममा विद्युत् सेवा नपुगेका जिल्लाभित्रका मतदान केन्द्रमा यथाशीघ्र विद्युतीकरणको व्यवस्था मिलाउन अनुरोध गरेको हो ।
निर्वाचन प्रक्रिया निष्पक्ष, शान्तिपूर्ण र व्यवस्थित रूपमा सम्पन्न गर्न विद्युत् सेवा अत्यावश्यक भएकाले सम्बन्धित मतदान केन्द्रमा आवश्यक तयारी गर्न नेपाल विद्युत् प्राधिकरण डडेल्धुरा वितरण केन्द्रलाई निर्देशन दिइएको हो ।
परशुराम नगरपालिका, आलिताल गाउँपालिका र भागेश्वर गाउँपालिकाका गरी विभिन्न सातवटा मतदान केन्द्रमा विद्युत्को पहुँच पुगेको छैन । आलिताल गाउँपालिकाको समैजेश्वर प्रावि सेला मतदान केन्द्र, परशुराम नगरपालिकाको भागेश्वर मावि बसौटी मतदान केन्द्र, सिद्धनाथ मावि मतदान केन्द्र कटाल तथा भागेश्वर गाउँपालिकाको कैलपाल देवल मावि पत्रम, पशुपति आवि बलडा, भागेश्वर आवि लेकुडा र डम्वरपूर आवि चौड मतदान केन्द्रमा विद्युत् सेवा पुगेको छैन ।
विद्युत् नपुगेका केन्द्रहरूमा विद्युत् आपूर्ति गर्न नसकिए निर्वाचन व्यवस्थापन, मतगणना तथा सुरक्षा तथा सञ्चारसम्बन्धी काममा समस्या उत्पन्न हुन सक्ने भएकाले समयमै आवश्यक पहल गर्न आग्रह गरिएको हो ।
निर्वाचनको संवेदनशीलतालाई ध्यानमा राख्दै विद्युत् सेवा अवरुद्ध नहुने व्यवस्था मिलाउन तथा सम्भावित जोखिम न्यूनीकरणका लागि समन्वयात्मक रूपमा काम गर्न सम्बन्धित निकायलाई आग्रह गरेको डडेल्धुराका सहायक प्रमुख जिल्ला अधिकारी अमरबहादुर वलीले बताए ।
