बैतडी — बैतडीको शिवनाथ गाउँपालिका–२ सनकोट, खाल बस्ने ५२ वर्षीय देवानसिंह साउद मृत फेला परेका छन् । 

बुधबार साँझदेखि हराइरहेका साउद शुक्रबार दिउँसो खाल नजिकैको भीर तलको खोलामा मृत फेला परेका शिवनाथ गाउँपालिकाका अध्यक्ष कर्ण साउदले बताए । अध्यक्ष र मृतक साउद गाउँले हुन् । मृतकका आफन्तले घटना शंकास्पद रहेकाले हत्या गरिएको आशंका गरेका छन् । 

कसरी फेला पर्‍यो साउदको शव ?

साउद बुधबार दिउँसो ४ बजेतिर घरबाट मासु ल्याउन जान्छु भनेर गाउँ नजिकैको पसलमा गएका थिए ।  साँझ अबेरसम्म घर नफर्केपछि घरका मान्छे पसलमा पुगेर पसलेसँग सोधपुछ गरेका थिए । मृतक साउद पसलमा मदिरा सेवन गरी घर जान्छु भनी घरतिर हिँडेको पसलेले बताएका थिए ।

घरका मान्छेले राति अबेरसम्म खोज्दा पनि कहीँ नभेटिएपछि बिहीबार खोजतलासका लागि प्रहरी चौकी सर्मालीमा निवेदन दिएका थिए । प्रहरीले मृतकको फोटोसहित खोजतलासको लागि सूचना जारी गरेको भए पनि घरका मान्छे, आफन्त र आफूसहित वडाध्यक्षले दिनभरि खोज्दा पनि कहीँ नभेटेको गाउँपालिका अध्यक्ष साउदले बताए ।

शुक्रबार दिउँसो साउदको घर जाने बाटोको ठिक विपरीत मदिरा सेवन गरेकै पसलेकै घर नजिकैको भीर तल खोलामा गोठालाहरूले उनको शव फेला पारेको उनले बताए । ‘देवानको घर जाने बाटोको विपरीततिर उनको शव भेटिएको छ,’ उनले भने, ‘मदिरा खाएको भएपनि घरतिर जानुको सट्टा उल्टो बाटो किन गए ?, घटना शंकास्पद छ ।’ मृतकको मुखमा घाउचोट देखिएको उनले बताए ।