बैतडी — बैतडीको पाटनमा रहेको भेटेरिनरी अस्पताल तथा पशु सेवा विज्ञ केन्द्र एक वर्षदेखि पशु चिकित्सकविहीन छ ।

विज्ञ केन्द्रमा एक जना पशु सेवा चिकित्सको दरबन्दी एक वर्षदेखि रिक्त छ । करारमा कार्यरत पशु चिकित्सक विशाल पाठक गत वर्षको मंसिरमा कर्णाली प्रदेशमा स्थायी पदमा नाम निकालेपछि हालसम्म विज्ञ केन्द्र चिकित्सकविहीन छ ।

सुदूरपश्चिम प्रदेश सरकारको भूमि व्यवस्था तथा कृषि सहकारी मन्त्रालय मातहत रहेको विज्ञ केन्द्रमा एक वर्षदेखि पशु चिकित्सक नहुँदा पनि पदपूर्ति हुन सकेको छैन ।

विज्ञ केन्द्रमा पशु चिकित्सक नहुँदा पशु स्वास्थ्य सम्बन्धी विशेषज्ञ सेवा प्रदान गर्न नसकिएको भेटेरिनरी अस्पताल तथा पशु सेवा विज्ञ केन्द्र पाटनका प्रमुख गुमानीदत्त पन्तले बताए । ‘पशुमा लाग्ने रोगको पहिचान तथा निदान, निरोगिता प्रमाणित, ल्याब, शल्यक्रिया, डाइग्नोसिस जस्ता पशु स्वास्थ्य सेवा प्रभावित बनेका छन्,’ उनले भने, ‘विज्ञ केन्द्र भनेपछि एक जना चिकित्सक नियमित नै चाहिन्छ ।’