डडेलधुरा — वन्यजन्तु अपराधमा अदालतको फैसला कार्यान्वयन गर्न प्रहरीले डम्बर ऐरलाई पक्राउ गरेको छ। जिल्ला प्रहरी कार्यालय डडेलधुराबाट खटिएको टोलीले अमरगढी नगरपालिका–१ तडीबाटा बस्ने ५० वर्षीय ऐरलाई मंगलबार नियन्त्रणमा लिएको हो।

 जिल्ला अदालत डडेलधुराले ऐरलाई बिना इजाजत वन्यजन्तु सम्बन्धी अपराधमा दोषी ठहर गर्दै ६ दिन कैद र ५ हजार जरिवाना सजाय तोकेको थियो। अदालतको यही फैसलालाई कार्यान्वयन गर्ने क्रममा उनलाई पक्राउ गरिएको प्रहरी कार्यालयले जनाएको छ।

प्रहरीका अनुसार ऐरमाथि लागू गरिएको मुद्दाको फैसला कार्यान्वयन हुन बाँकी थियो। जिल्ला अदालतले सुनाएको सजाय कार्यान्वयन गर्न अति वाञ्छित सूचीमा राखिएका व्यक्तिहरूको खोजी भइरहेका बेला प्रहरीले ऐरको हालसम्मको बसोबास, आवागमन र गतिविधिबारे सूक्ष्म जानकारी संकलन गर्दै आएको थियो। अन्ततः मंगलबार उनलाई तडीबाटा बाटै नियन्त्रणमा लिइएको प्रहरीको भनाइ छ।