डोटी — सुदूरपश्चिम प्रदेशमा स्वास्थ्य क्षेत्रमा कार्यरत सरकारी तथा गैरसरकारी संस्थाहरूले १३ बुँदे साझा प्रतिबद्धता गरेका छन् ।

शुक्रबारदेखि स्वास्थ्य निर्देशनालय, राजपुर डोटीमा सञ्चालित स्वास्थ्य क्षेत्रको एकीकृत वार्षिक समीक्षा कार्यक्रमको समापन सत्रमा १३ बुँदे राजपुर प्रतिबद्धतापत्र सार्वजनिक गरिएको हो ।

संघीय स्वास्थ्य तथा जनसंख्या मन्त्रालय, सुदूरपश्चिम प्रदेश सामाजिक विकास मन्त्रालय, प्रादेशिक तथा जिल्लास्थित स्वास्थ्य निकाय, विकास साझेदार संस्थाहरू र स्वास्थ्य क्षेत्रका सरोकारवालाहरूको सहभागितामा तयार गरिएको प्रतिबद्धतापत्रमा प्रदेश सरकार अन्तर्गतका स्वास्थ्य निकायहरूको बेरुजु न्यूनीकरण गर्न आन्तरिक नियन्त्रण प्रणालीलाई थप सुधार गर्ने उल्लेख छ ।

उपचारमा खल्तीबाट हुने खर्च न्यून गर्न प्रत्येक जिल्लामा कम्तीमा ४० प्रतिशत व्यक्तिलाई स्वास्थ्य बिमाको पहुँचमा ल्याउने, प्रदेश सरकारका सबै कर्मचारीहरूको स्वास्थ्य बिमा गर्न पहल गर्ने र आर्थिक रूपमा अतिविपन्न महिलाको सुरक्षित मातृत्व तथा प्रजनन स्वास्थ्यका लागि ८८ वटै पालिकालाई प्रदेश कानुनबमोजिम सशर्त अनुदान दिने कानुनी व्यवस्था कार्यान्वयन गर्न पैरवी गर्ने प्रतिबद्धतापत्रमा उल्लेख छ ।