कञ्चनपुर — भदौ २३ को आन्दोलन र २४ गतेको प्रदर्शनका क्रममा भएको घटनाको जाँचबुझ गर्न गठित उच्च स्तरीय जाँचबुझ आयोगको टोलीले कञ्चनपुरमा आगजनी र तोडफोड भएका घरहरुको अनुगमन गरेको छ ।

टोलीले बिहीबार सरकारी कार्यालय र निजी घरहरुमा पुगेर अवस्थाबारे जानकारी लिएको हो ।

आयोगका सदस्य विशेश्वर प्रसाद भण्डारीको नेतृत्वको टोलीले कृष्णपुर नगरपालिकासँगै तत्कालीन गृहमन्त्री रमेश लेखक, सुदूरपश्चिमका पूर्वमुख्यमन्त्री राजेन्द्रसिंह रावललगायतको घरमा भएको आगजनी र तोडफोडको अवस्थाबारे प्रत्यक्ष अनुगमन गरेको हो । ‘आगजनी र तोडफोडको अवस्था हेर्दा सबै एउटै प्रकृतिको छ, त्यतिबेलाका भिडियो र फोटोहरु हेर्दा ट्रेण्ड पनि एकनासको छ,’ अनुगमनपछि आयोजित अन्तरक्रियामा बोल्दै आयोगका सदस्य भण्डारीले भने, ‘अहिले हामीहरुले देशभरि प्रतिनिधिमूलक रुपमा अनुगमन गरिरहेका छौं ।’

सदस्य भण्डारीले तोडफोड र आगजनीमा संलग्नलाई कारवाही हुनुपर्ने माग जोडतोडले उठेको बताए । ‘पीडितहरुमा कतै दण्डहीनताले प्रश्रय पाउँछ कि भन्ने चिन्ता छ, तर त्यसो हुँदैन, हामीले पनि त्यही हिसाबले सरकारलाई सिफारिस गर्छौं,’ उनले भने, ‘दण्डहीनताले प्रश्रय पाए, राज्य र समाज बिग्रिन सक्छ, समयमै यसलाई सम्बोधन गर्नुपर्छ भन्ने सबैको धारणा आएको छ ।’

कर्णाली प्रदेश राजधानी सुर्खेतमा अनुगमन सकेर टोली कञ्चनपुर पुगेको हो । शुक्रबार उक्त टोलीले कैलालीमा पनि अनुगमन गर्ने कार्यक्रम तय भएको छ ।