पहिरोका कारण गिरेगडादेखि बैतडी सदरमुकामसम्मको सडक तीन दिनदेखि अवरुद्ध छ, पानी नरोकिनाले सडक खुलाउन समस्या भएको छ।
बैतडी — बिहीबार रातिदेखि परेको वर्षाले पहिरो जाँदा देहीमान्डौं-गिरेगडा सडक तीन दिनदेखि अवरुद्ध बनेको छ। दशरथचन्द नगरपालिका–२ सुन्दरखाली नजिक सडक माथिबाट आएको पहिरोले सडक पूर्णरूपमा अवरुद्ध भएको जिल्ला प्रहरी कार्यालयका प्रवक्ता प्रहरी निरीक्षक बलराम पाण्डेयले बताए ।
सडकमाथिबाट पहिरो खसेपछि तीन दिनदेखि सडक अवरुद्ध बनेको छ,’ उनले भने, ‘सडक खुलाउने प्रयास भइरहे पनि, पानी नरोकिनाले समस्या भइरहेको छ ।’
सडक अवरुद्ध बनेपछि गिरेगडादेखि बैतडी सदरमुकाम आउने र सदरमुकामदेखि गिरेगडा, पन्चेश्वर जाने सवारीसाधन बन्द भएका छन् । बैतडीमा चारदिन देखि निरन्तर वर्षा भइरहेको छ । यस्तै नेपाल भारत सिमामा रहेको जुलाघाट बजार नजिक पनि पहिरो गएको छ ।
यो पहिरो जुलाघाट जाने गाडी रोकिने ठाउँमा गएकाले यस्ले यातायताका साधन आवतजावतमा समस्या नगरेको प्रहरीले जनाएको छ । यी दुई ठाउँबाहेक जिल्लाका अरु ठाउँका सडक अवरुद्ध भए नभएको जानकारी अहिले सम्म प्राप्त नभएको जिल्ला प्रहरी कार्यालय बैतडीले जनाएको छ ।
